Umutwe wa M23 urimo kugenzura agace ka Kazinga nyuma y’intambara yayihuje na FARDC ifatanya na Wazalendo

Nyuma y’imirwano ikomeye yahuje umutwe wa AFC/M23 n’ingabo za Repulika Iharanira Demokarasi ya Congo, Umutwe wa M23, yafashe agace ka Kazinga gaherereye mu Karere ka Masisi , muri Kivu y’Amajyaruguru.

Kazinga ni umugi muto, uherereye mu gace ka Butsike, Gurupoma ya Nyamaboko I mu karere ka Masisi ho muri Kivu y’Amajyaruguru.Uwo mugi wafashwe n’abarwanyi ba AFC/M23 ku cyumweru tariki 06 Nzeri 2026 nk’uko bimwe mu bitangazamakuru dukesha iyi nkuru byabitangaje.

Amakuru avuga ko uwo mugi wafashwe nyuma y’imirwano ikomeye yahuje ingabo za Leta ya Congo na Wazalendo ndetse na AFC/M23. Bivugwa ko kandi iyo mirwano yatangiye ku wa Gatandatu ubwo AFC/M23 yagabaga igitero ku birindiro by’ingabo z’umutwe wa Wazalendo, biherereye mu Murenge wa Osso Banyungu.

Ifatwa ry’ako gace, rije rikurikira utundi duce twafashwe n’umutwe wa AFC/M23 nk’uko amakuru abitangaza , harimo ; Shango, Mahanga, na Katsihiro na centre y’ubucuruzi ya Humura ndetse ngo abaturage bakaba bakomeje guhatirwa kuva mu byabo n’izo ntambara.

Nyuma y’iyo mirwano Actualite cd yo muri DRC, yatangaje ko ingabo za Leta na Wazalendo bahise berekeza ahitwa Kishee, mu majyepfo ya Gurupoma ya Nyamaboko ya Mbere.Kugeza ubu umwuka uracyari mubi muri ako gace ka Banyungu kubera abarwanyi bari kunyuranamo.