Umutoza wa Real Madrid y'abagore , Pau Quesada, yatangaje ko ikipe atoza ifite ubushobozi bwo kwegukana ibikombe bya shampiyona yo mu Bwongereza ndetse no mu Budage, avuga ko ikintu gikomeye kiyibera inzitizi muri Espagne ari uguhangana na FC Barcelona Women imaze igihe yihariye ruhago y'abagore muri icyo gihugu.
Ibi yabigarutseho nyuma y'umukino wa UEFA Women's Champions League wahuje Real Madrid na Bayern Munich ku wa 28 Ukwakira 2026, ukarangira amakipe yombi anganyije ibitego 2-2. Real Madrid yari yabanje kuyobora umukino n'ibitego ibitego 2-0, ariko Bayern Munich iza kubyishyura.
Mu kiganiro yagiranye n'itangazamakuru nyuma y'umukino, Quesada yavuze ko Real Madrid itahabwa agaciro gahagije kubera ko ihora ihanganye na Barcelona mu rugamba rwo guhatanira ibikombe.Yagize ati: "Ukuri ni uko iyo tutaza guhura na Barcelona, ubu tuba dufite ibikombe birenze kimwe" Yakomeje avuga ko Barcelona ari ikipe ikomeye kubera imiterere yayo, uburyo abakinnyi bayo bamaze igihe kinini bakina hamwe ndetse n'uburyo club yubatse umushinga wayo wa ruhago y'abagore.
Nubwo bimeze bityo, Quesada yavuze ko kudatwara ibikombe bitagomba gufatwa nk'impamvu yo kwiheba, ahubwo bikwiye gutuma Real Madrid irushaho kongera imbaraga no kuzamura urwego rw'imikinire.
Yagize ati: "Barcelona ni yo kipe igoye guhangana na yo kubera ko ifite imiterere ihamye kandi abakinnyi bayo bamaze igihe kinini bakina hamwe,Ariko dushobora kuyitsinda, kandi tuzayitsinda muri iyi shampiyona."
Gusa Barcelona ni inzitizi ikomeye ku nzozi za Real Madrid ; Kuva Real Madrid yatangira umushinga wayo w'ikipe y'abagore mu 2020, imaze kugenda izamura urwego, ishaka guhangana n'amakipe akomeye ku mugabane w'u Burayi.Gusa FC Barcelona Women yakomeje kuyirusha imbaraga muri ruhago yo muri Espagne, aho imaze kwigarurira ibikombe bikomeye birimo ibya shampiyona ndetse na UEFA Women's Champions League.
Amagambo ya Quesada ariko yanenzwe n'abasesenguzi bamwe, bibaza niba koko Real Madrid yari kuba yaratsinze shampiyona z'u Bwongereza n'u Budage, kuko ayo mashampiyona na yo afite amakipe akomeye arimo Chelsea, Arsenal, Bayern Munich na Wolfsburg.Ikindi kandi, Real Madrid iracyafite urugendo rwo kwigaragaza mu marushanwa y'imbere mu gihugu no ku rwego rw'u Burayi.
Mu by'ukuri, amagambo ya Quesada ni igitekerezo cye gishingiye ku rwego abona ikipe ye igezeho, ntabwo ari ikintu cyamaze kwemezwa n'ibisubizo byo mu kibuga.Icyakora, afite intego yo guhindura Real Madrid ikipe ishobora guhangana na Barcelona ndetse n'andi makipe akomeye ku mugabane w'u Burayi.Mu magambo ye, umutoza wa Real Madrid yagaragaje ko atanyuzwe no kunganya na Bayern Munich, kuko ikipe ye yari yagiye iwayo ishaka intsinzi.
Ibyifuzo by’abasomyi
