Amateka Y’Intama Yabanaga Na RPF Inkotanyi Mu Kubohora Igihugu.

Mu mateka y’urugamba rwo kubohora u Rwanda no guhagarika Jenoside yakorewe Abatutsi mu 1994, harimo inkuru idasanzwe y’intama y’umweru yagaragaraga mu mafoto iri kumwe n’abasirikare ba RPA Inkotanyi. Iyi ntama yagiye ivugisha benshi, bamwe bibaza icyo yari ihuriyeho n’abasirikare ndetse n’uruhare yaba yaragize mu rugamba,Abandi bakavugako Ari ikimenyetso cy'Imana cy'uko uru rugamba rwo kubohora igihugu mu wa 1994 Rwari rurimo Imana .

Iyi nkuru yongeye kumenyekana cyane ku wa 9 Mutarama 2020, ubwo General James Kabarebe, wari Umujyanama wa Perezida wa Repubulika mu by’umutekano, yayisobanuriraga abarimu bigisha amateka bari mu mahugurwa y’itorero ry’igihugu i Nyanza mu Ntara y’Amajyepfo.

Uti "intama yari yaramenyereye ubuzima bwa gisirikare" Nk’uko General James Kabarebe yabisobanuye, iyi ntama yari yaratoraguwe n’abasirikare bo muri Batayo ya 101, yayoborwaga na Kapiteni Vedaste Kayitare. Iyi batayo yari izwi ku izina rya Simba Battalion,iyi ntama yaje kumenyera abasirikare ku buryo yagendaga ibakurikira, ikabana na bo mu bikorwa bitandukanye bya gisirikare.

Igitangaje kurushaho ni uko yari yaramenyereye imyitozo n’imyiyereko ya gisirikare (military parade). Iyo abasirikare bahindukiraga, na yo yarahindukaga; iyo batayo yimukaga, na yo ikayikurikira,General Kabarebe yavuze ko n’igihe abasirikare bavangaga batayo zabo, iyi ntama yashoboraga kumenya batayo yayo ikayisanga,Ibi byatumye abantu benshi bayibona nk’inyamaswa yari yaragize umubano udasanzwe n’abasirikare bari bayibanye na yo.

Mu myaka yakurikiyeho, amafoto y’iyi ntama ari kumwe n’Inkotanyi yakomeje gukwirakwira, bituma havuka ibitekerezo bitandukanye ku cyo yaba yarasobanuraga,Hari abakekaga ko yari ikimenyetso cy’imbaraga zidasanzwe, ubupfumu cyangwa imigenzo gakondo yakoreshwaga mu gufasha abasirikare gutsinda urugamba,Icyakora, General James Kabarebe yahakanye ibyo bitekerezo, asobanura ko nta mbaraga zidasanzwe yari ifite kandi ko itakoreshwaga mu buhanuzi cyangwa ubupfumu Yasobanuye ko yari inyamaswa yari yaramenyereye abasirikare n'ubuzima babagamo.

Igisasu cya Mortier cyayigizeho ingaruka mu 1994: Nubwo iyi ntama yari yarabaye inshuti y’abasirikare, ubuzima bwayo bwaje kurangira mu bihe bikomeye by’urugamba rwo guhagarika Jenoside yakorewe Abatutsi mu 1994.

General Kabarebe yavuze ko igihe RPA yatangizaga ibikorwa bya gisirikare bigamije guhagarika Jenoside, igisasu cya Mortier cyayigizeho ingaruka birangira ipfuye,Yavuze ko nubwo yari yarabanye n’abasirikare mu bihe bitandukanye by’urugamba, itashoboye kurokoka ibitero byari byagabwe kuri bo.

Inkuru y’iyi ntama ni imwe mu nkuru zidasanzwe zagiye zigarukwaho mu mateka y’urugamba rwo kubohora u Rwanda. Yerekana uburyo inyamaswa ishobora kumenyera abantu, imibereho yabo n'ibikorwa bya buri munsi kugeza ubwo iba igice cy'ubuzima bwabo.

Nubwo itari umusirikare kandi nta ruhare rwa gisirikare yari ifite, iyi ntama yakomeje kwibukwa kubera uburyo yari yarabanye n’abasirikare ba Batayo ya 101.

Iyi nkuru yasobanuwe na General James Kabarebe mu rwego rwo gukuraho urujijo rwari rumaze igihe rugaragara ku mafoto yayo, igaragaza ko inyuma y’amafoto y’amateka hari n’inkuru nto zidasanzwe zifasha abantu kurushaho gusobanukirwa n'ibyabaye mu bihe byashize.