Trump Yemeye Kwihutisha Visa y'Umubyeyi w’umwana wiciwe muri New York

Ibi byatangajwe na Meya wa New York, Zohran Mamdani, ku wa 31 Ukwakira 2026, nyuma y’ikiganiro yagiranye kuri telefoni na Perezida Trump, amusaba gufasha uyu mubyeyi utari muri Amerika kubona uburenganzira bwo kwinjira muri icyo gihugu.

Mamdani yavuze ko Trump yemeye ko viza y’uyu mubyeyi itangwa mu buryo bwihuse, kugira ngo abone uko ajya muri Amerika agasezera umuhungu we. Yavuze ko nta mubyeyi ukwiye kubuzwa gusezera umwana we kubera intera iri hagati y’ibihugu.

Javits Frimpong ni umwana w’imyaka 15 wakomokaga muri Ghana, akaba yari yarimukiye muri Leta Zunze Ubumwe za Amerika mu 2025, ajya kubana na se witwa Thomas Frimpong mu gace ka Bronx, i New York.

Ku wa Kane, tariki ya 29 Ukwakira 2026, ubwo yari mu nzira ajya ku ishuri rya DreamYard Preparatory School, yarashwe mu nda hafi ya Crotona Park. Abapolisi bamujyanye mu bitaro bya St. Barnabas Hospital, ariko aza kwitaba Imana.

Nyuma y'urupfu rwe, se yavuze ko umuhungu we yari yarigeze kubangamirwa na bagenzi be biganaga, ndetse ko ubuyobozi bw’ishuri bwari bwaramumenyesheje ko hari abanyeshuri babiri bahagaritswe by’agateganyo kubera kumutoteza. Gusa, inzego za polisi ntizari zatangaza ko zemeje isano iri hagati y’icyo kibazo n’iraswa rye.

Guverinoma ya Ghana na yo yatangaje ko iri gufasha uyu muryango, aho Minisiteri y’Ububanyi n’Amahanga yijeje gufasha nyina wa Javits mu rugendo rwo kujya muri Amerika. Yanavuze ko izakorana n’inzego z’Amerika kugira ngo hakorwe iperereza rigamije kumenya abishe uyu mwana no kubashyikiriza ubutabera.

Kugeza ku itariki ya 1 Ugushyingo 2026, polisi yari itaratangaza ko hari abakekwaho ubu bwicanyi bafashwe, iperereza rikaba ryari rigikomeje,Iyi nkuru yakurikiwe n’agahinda mu muryango wa Javits no mu baturage baturutse muri Ghana baba muri Amerika, cyane ko nyina yari ari mu kindi gihugu mu gihe umuhungu we yitabaga Imana.