Umukinnyi w’ikipe ya Real Madrid, Vinicius Junior, n’abamuhagarariye ndetse n’ikipe ye bahakanye ibihuha byakwirakwiye ku mbuga nkoranyambaga bivuga ko uyu mukinnyi yaba yarishwe, agasimbuzwa undi muntu usa na we.
Ibi bihuha byatangiriye ku mbuga nkoranyambaga muri Brazil by’umwihariko, nyuma bigera no mu bitangazamakuru by’imikino byo muri Espagne gusa kugeza ubu nta gihamya cyangwa amakuru yemeza ibyo bivugwa, kandi abantu ba hafi ya Vinicius ndetse n’abahagarariye Real Madrid babihakanye ku mugaragaro.
Abantu bakomeje gukwirakwiza ayo makuru bavuga ko Vinicius ukinira Real Madrid yaba atandukanye n’uwo baheruka kubona mu ikipe y’igihugu ya Brazil, cyane cyane ku bijyanye n’ibishushanyo byari ku mubiri (tattoos) we, imiterere y’isura n’amatwi kuko bagenda bibegereranya na we wa mbere (Before and After).
Bashyira amafoto atandukanye ku mbuga nkoranyambaga bakayagereranya, bavuga ko agaragaza itandukaniro rinini nyamara bamwe bakirengagiza ko amafoto ashobora gutandukana bitewe n’uko yafashwe, urumuri, uko umuntu ahagaze imbere ya kamera, guhindurwa kw’amafoto cyangwa impinduka umuntu ashobora kuba yaragize ku isura nk’uko bishimangirwa n’abatemeranya nabo.
VINICIUS YAVUZE KU MPINDUKA Y’ISURA YE
Vinicius ubwe yigeze gusobanura ko yakoze ibizwi nka ‘facial harmonization’, ibintu bishobora gutuma isura igaragara mu buryo butandukanye n’uko yari imeze mbere.
Nubwo yabisobanuye, bamwe mu bakwirakwiza amakuru y’uko yapfuye agasimbuzwa undi ntibabyemeye, ahubwo bakomeza kuvuga ko ari umuntu wasimbujwe.
Bivugwa ko kandi impamvu nyamukuru yatumye asimbuzwa ari ukugira ngo ibigo by’abaterankunga n’abo yamamariza bikomeze amasezerano byari bifitanye na we.
IBIHUHA BYONGEYE GUHUZA VINICIUS N’UMUPFUMU WO MURI BRAZIL
Iyi nkuru kandi yaje guhuza n’amagambo yavuzwe n’umuntu wo muri Brazil uzwi nka Vó Bahiana, wigeze kuvuga mu gihe cy’Igikombe cy’Isi ko Vinicius na Neymar bazashimutwa n’ibiremwa byo mu isanzure.
Iryo sebenya ntiryabaye impamo, ariko ryongeye kuvugwa nyuma y’uko ibihuha bishya kuri Vinicius bitangiye gukwirakwira.
Mu by’ukuri, Vinicius Junior aracyakina muri Real Madrid, kandi nta gihamya cyizewe cyatanzwe cyemeza ko yaba yarasimbujwe undi muntu usa na we. Ibyo bivugwa ku mbuga nkoranyambaga bikomeje gufatwa nk’ibihuha bidafite gihamya.
