Ikipe ya FC Barcelona irakira Deportivo Alavés mu mukino w’umunsi wa 11 wa shampiyona ya Espagne, La Liga, ifite ikibazo cy’abakinnyi benshi bakomeje kuvurwa imvune, by’umwihariko mu bwugarizi.
Kuri uyu wa Gatandatu, tariki ya 31 Ukwakira 2026, Barcelona irakira Deportivo Alavés kuri Spotify Camp Nou, mu mukino itegerejweho gushaka amanota atatu kugira ngo ikomeze kuyobora urutonde rwa shampiyona.
Iyi kipe iri gutozwa na Hansi Flick irahura n’uyu mukino ifite abakinnyi batandatu b’ingenzi batabasha kuyifasha kubera imvune zitandukanye.
Abakinnyi ba Barcelona bari hanze y’ikibuga ni Andreas Christensen, ufite imvune yo ku itako, Dani Olmo ufite ikibazo cy’imikaya, Eric García ufite imvune yo ku itako, Jules Koundé wavunitse akaguru, Xavi Espart ufite imvune yo ku kabumbambari ndetse na Roony Bardghji wavunitse ivi rikomeye ku buryo yangiritse imitsi ihuza amagufwa y’ivi (cruciate ligament).
Iki kibazo gishobora gukomeza kugora Hansi Flick, cyane cyane mu bwugarizi, aho kubura Koundé, Christensen na Eric García bigabanya amahitamo y’abakinnyi afite muri uwo murongo.
Ibi byatumye umutoza Hansi Flick ahamagara bamwe mu bakinnyi bakiri bato kugira ngo bongere amahitamo mu ikipe. Mu bahamagawe harimo Guillem Víctor, Álex Campos na Ebrima Tunkara.
Uyu mukino uje nyuma y’ibihe bitari byiza kuri Barcelona, iheruka gutsindwa na Paris Saint-Germain ibitego 4-2 mu mikino ya UEFA Champions League, mbere yo gutsindwa na Real Madrid ibitego 2-1 muri El Clásico.
Nubwo yahuye n’izo nzitane, Barcelona iracyayoboye La Liga n’amanota 27 mu mikino 10, mu gihe Deportivo Alavés iri ku mwanya wa karindwi n’amanota 12.
Ku rundi ruhande, Alavés nayo izakina uyu mukino idafite Facundo Garcés na Mikel Rodríguez, bombi bafite ibibazo by’imvune zo mu ivi.
Deportivo Alavés si ikipe Barcelona ikwiye gufata nk’aho idashobora kuyigora. Mu mukino wahuje amakipe yombi muri Gicurasi 2026, Alavés yatsinze Barcelona igitego 1-0.
Barcelona irasabwa kwitwararika kugira ngo idatakaza andi manota, cyane cyane ko Atlético Madrid na Real Madrid biri mu makipe ayihigira umwanya wa mbere.
Umukino urabera kuri Spotify Camp Nou saa tatu z’ijoro ku isaha ya Kigali (22:00), Barcelona ikaba ishaka gukoresha amahirwe yo gukinira imbere y’abafana bayo kugira ngo yongere kwigarurira icyizere mubafana bayo .
Ibyifuzo by’abasomyi
