Umuraperi w’Umunyamerika Calvin Cordozar Broadus Jr., wamamaye ku izina rya Snoop Dogg, yinjiye mu bashoramari ba Swansea City AFC, ikipe yo muri Wales ikina mu cyiciro cya kabiri cy’umupira w’amaguru mu Bwongereza (EFL Championship), aho yaguze imigabane muri iyi kipe.
Ku wa 17 Nyakanga 2025 ni bwo Swansea City yatangaje ku mugaragaro ko Snoop Dogg abaye umwe mu bafatanyabikorwa bayo (co-owner and investor), nyuma y’uko yari yabanje kugaragara mu mashusho yamamaza umwambaro mushya w'iyi kipe w'umwaka w'imikino wa 2025/2026.
Nubwo Snoop Dogg yemejwe nk'umwe mu bashoramari bafite imigabane mike (minority stakeholder), Swansea City ntiyigeze itangaza amafaranga yashoye cyangwa ijanisha ry'imigabane yaguze.Icyakora, ku wa 5 Nzeri 2025, ikinyamakuru Sports Business Journal cyatangaje ko Swansea City yashakaga gushaka miliyoni 67 z'amadolari ya Amerika mu bashoramari bashya, hagamijwe kwihutisha iterambere ry'iyi kipe,Iyo gahunda yo gushaka miliyoni 67 z'amadolari yari iy'ikipe muri rusange, ntabwo ari amafaranga Snoop Dogg yashoyemo.
Mu butumwa bwe ubwo yatangazwaga nk'umushoramari, Snoop Dogg yavuze ko gukunda umupira w'amaguru ari ikintu kimuranga, ariko ko amateka ya Swansea n'akarere iherereyemo yamukoze ku mutima
Yagize ati:"This is a proud, working class city and club. An underdog that bites back, just like me" ; Bisobanuye ko Swansea ari umujyi n'ikipe byubakiye ku baturage bakora cyane, kandi bifite umuco wo guhangana n'ibikomeye, nk'uko na we abyibonamo.
Impamvu y'ingenzi y'ishoramari rye kandi ni ugufasha iyi kipe kwagura izina ryayo ku rwego mpuzamahanga, kongera abafana, gukurura abaterankunga no guteza imbere ubucuruzi bwayo.
Abayobozi b'iyi kipe bagaragaje ko kuba Snoop Dogg afite abafana benshi ku isi bishobora kuyifasha kugera ku masoko mashya no kongera amafaranga ava mu bikorwa by'ubucuruzi, bityo akazayifasha gushora imari mu bakinnyi no kubaka ikipe ihangana.
Snoop Dogg yinjiye mu itsinda ry'abashoramari barimo Luka Modrić, wahoze akinira Real Madrid, na we waguzemo imigabane muri Swansea City muri Mata 2025,Iyi kipe iyobowe n'abanyamerika Brett Cravatt na Jason Cohen, bayoboye igikorwa cyo kuyigura mu Gushyingo 2024.
Swansea City iheruka gukina muri Premier League mu mwaka wa 2018, ikaba ikomeje intego yo kongera ubushobozi bwayo no guhatanira kuzamuka mu cyiciro cya mbere,Ishoramari rya Snoop Dogg rero ntirishingiye gusa ku kuba umufana w'umupira w'amaguru, ahubwo ni n'umushinga wo gukoresha izina rye n'ubushobozi bwe mu kwamamaza no guteza imbere ikipe ya Swansea City.
Ibyifuzo by’abasomyi
