Uwahoze ari umukinnyi w’Ikipe y’Igihugu y’u Bwongereza, Andros Townsend, yahuye n’impanuka idasanzwe ubwo yagongana n’ mashini ikora ikibuga mbere y’umukino wa Thai Pro League, ariko ku bw’amahirwe ntiyagira imvune ikomeye.
Ibi byabereye kuri Pattani Province Stadium ku wa Gatandatu, ubwo Townsend w’imyaka 35 yari ari mu myiteguro yishyushya mbere y’umukino ikipe ye ya PT Prachuap yari igiye gukina.Mu mashusho yakwirakwiye ku mbuga nkoranyambaga, Townsend agaragara agerageza kugenzura umupira, maze aza kugwa imbere y’imashini ikora ikibuga yari iri mu kazi.
Iyo mashini yari itwawe n’umushoferi yaje kumukandagira ku maguru, bituma bagenzi be mu kibuga bagira ubwoba bwinshi, bamwe baza kureba uko ameze.Townsend na we yagerageje gusunika iyo mashini kugira ngo imuveho, mbere y’uko umushoferi ayihagarika maze akamanuka akajya kumufasha.
Amafoto yafashwe n’ibitangazamakuru byo muri ako gace yagaragaje ko Townsend yagize igisebe n’ibikomere ku itako, ariko nyuma y’umukino yemeje ko nta kibazo gikomeye yagize.Uyu mukinnyi na we ubwe yafashe ibyabaye nk’ibisekeje, asangiza amashusho y’iyo mpanuka ku rubuga rwa Instagram. Yayashyizeho amagambo agira ati: “Undi munsi usanzwe muri ruhago ya Thailand.
Nubwo yari yagize ako kantu mbere y’umukino, Townsend ntiyagize ikibazo cyamubuza gukina. Ikipe ye ya PT Prachuap yatsinze umukino ibitego 3-0, ndetse Townsend aza mu kibuga asimbuye mu minota ya nyuma.
Townsend yageze muri PT Prachuap mu mpeshyi avuye muri Kanchanaburi Power, indi kipe yo muri Thailand, ndetse muri uyu mwaka w’imikino amaze kugaragara mu mikino itatu.Yageze muri Thai Pro League muri Kanama 2025, nyuma yo gukinira Antalyaspor muri Türkiye.
Uyu mukinnyi wakuriye mu ishuri ry’umupira rya Tottenham Hotspur afite ubunararibonye bukomeye mu Bwongereza, aho yakinnye imikino 291 muri Premier League, akinira amakipe nka Tottenham Hotspur, Crystal Palace, Everton na Luton Town.
Mu mwuga we umaze kumugeza mu makipe 17 atandukanye, Townsend kandi yakiniye Ikipe y’Igihugu y’u Bwongereza inshuro 13 hagati ya 2013 na 2016.
