Umunya-Paris Olivier Giroud ukinira Lille OSC akomeje kugaragaza ko imyaka itabuza umukinnyi gukora amateka mu mupira w'amaguru. Ku myaka 40, uyu rutahizamu yongeye kwandika amateka mashya nyuma yo gufasha ikipe ye gutsinda Derby du Nord ihuza Lille na RC Lens.
Ku wa Gatanu, tariki ya 30 Ukwakira 2026, Lille OSC yatsinze mukeba wayo RC Lens igitego 1-0 mu mukino w'umunsi wa cyenda wa shampiyona y'icyiciro cya mbere mu Bufaransa, Ligue 1.
Igitego rukumbi cyabonetse muri uyu mukino cyatsinzwe na Olivier Giroud ku munota wa 87, nyuma y'uko umunyezamu wa Lens Robin Risser ananiwe gufata neza ishoti ryatewe na Nabil Bentaleb, Giroud agahita atsinda ku mupira wari ugarutse.
Iki gitego cyatumye Giroud umwe mubakinnyi beza ubufaransa bwagize agira amateka yihariye muri Derby du Nord, kuko yabaye umukinnyi ukuze kurusha abandi bose watsinze igitego muri uyu mukino w'amakipe akunze guhangana mu majyaruguru y'u Bufaransa.
Byongeyeho kandi, iki gitego cyatumye arenga Bafétimbi Gomis ku rutonde rw'abakinnyi b'Abafaransa batsinze ibitego byinshi mu mateka y'umupira w'amaguru wabigize umwuga.
Kugeza ku wa 30 Ukwakira 2026, Giroud yari amaze gutsinda ibitego 362, mu gihe Gomis yari afite 361. Ibyo byamushyize ku mwanya wa gatandatu kuri urwo rutonde.
Mu mibare ya shampiyona ya 2026/2027, Giroud yari amaze gukina imikino umunani ya Ligue 1, atsinda ibitego bitatu anatanga imipira ibiri yavuyemo ibitego (assists), nk'uko imibare ya La Liga yerekana.
Giroud ni umwe mu bakinnyi bafite amateka akomeye mu mupira w'amaguru w'u Bufaransa. Yatwaranye n'ikipe y'igihugu igikombe cy'Isi cya 2018, ndetse ni we mukinnyi watsindiye u Bufaransa ibitego byinshi mu mateka, aho afite ibitego 57 mu mikino 137 yakiniye Les Bleus.
Ku myaka 40, Olivier Giroud aracyerekana ko uburambe,ubuhanga no gukunda umupira w'amaguru bishobora gutuma umukinnyi akomeza guhangana ku rwego rwo hejuru.
Ibyifuzo by’abasomyi
