Ikipe ya Kiyovu Sports yatsinze Gasogi United ibitego 2-0, isubira mu makipe ane ya mbere muri Shampiyona y’u Rwanda, nyuma y’imyaka itanu itabasha kuyitsinda. Ni umukino w’Umunsi wa 26 wabereye kuri Kigali Pelé Stadium ku wa 3 Mata 2026, ukaba wari uwa mbere iyi kipe ikinnye idafite umutoza Haringingo Francis uherutse kwerekeza muri Rayon Sports. Kiyovu Sports yatozwaga by’agateganyo na Sebarera Ayubu Khaliru, utahinduye byinshi mu bakinnyi basanzwe babanza mu kibuga.
Igitego cya mbere cyabonetse ku munota wa 60, gitsinzwe na Rukundo Abdourahmani ku mupira wavuyemo amakosa ya myugariro wa Gasogi United. Mu minota ya nyuma y’umukino, Uwiyaremye Fidali yatsinze igitego cya kabiri nyuma yo gusiga ba myugariro ba Gasogi United, aroba umunyezamu. Iyi ntsinzi yatumye Kiyovu Sports igira amanota 42, ifata umwanya wa kane, mu gihe Gasogi United yagumanye amanota 26 ku mwanya wa 12.
