Abasirikare 254 bo mu Ngabo za Repubulika ya Centrafrique (FACA), barimo ba ofisiye n’abafite andi mapeti, ku wa 2 Ugushyingo 2026 basoje imyitozo y’ibanze y’ibikorwa bya gisirikare bidasanzwe imaze amezi atandatu. Iyi myitozo yatanzwe n’Ingabo z’u Rwanda (RDF) mu Kigo cya Gisirikare gitangirwamo imyitozo y’ibanze cya Nasho, giherereye mu Karere ka Kirehe.
Umuhango wo gusoza iyi myitozo wayobowe n’Umugaba Mukuru w’Ingabo z’u Rwanda, Gen MK Mubarakh, ari kumwe n’Umugaba Mukuru w’Ingabo za Centrafrique, Gen Zephirin Mamadou. Wanitabiriwe n’Abajenerali n’abandi ba ofisiye bakuru bo mu ngabo z’ibihugu byombi.
Iyi myitozo yari igamije kongerera abasirikare ba FACA ubushobozi bwo gukora ibikorwa bya gisirikare, binyuze mu myitozo ikomeye ibaha ubumenyi, ikinyabupfura n’ubunyamwuga bikenewe mu gusohoza inshingano z’ibikorwa bidasanzwe no gukorera neza mu bihe n’ahantu bigoye.
Umugaba Mukuru w’Ingabo z’u Rwanda yashimiye abasoje iyi myitozo ikomeye y’amezi atandatu, abashimira umurava, ikinyabupfura, ubudaheranwa n’ubushake bagaragaje mu gihe cyose bayimazemo. Yabashishikarije gukomeza kurangwa n’ubunyamwuga batojwe, gukorera igihugu cyabo bitanga no gukoresha neza ubushobozi bushya bungutse. Yongeye gushimangira ubushake bwa RDF bwo gusangiza ingabo z’ibihugu by’inshuti ubunararibonye n’ubumenyi bwayo, mu rwego rw’imbaraga zihuriweho zo kwimakaza amahoro, umutekano n’ituze ku mugabane wa Afurika.
Umugaba Mukuru w’Ingabo za Centrafrique, Gen Mamadou, yashimiye byimazeyo Guverinoma y’u Rwanda, ubuyobozi bwa RDF n’abatoza ku bw’umurava, ubunyamwuga n’ubwitange bagaragaje mu gihe cyose cy’imyitozo. Yashimangiye ko ubumenyi, ikinyabupfura n’ubushobozi abasirikare babo bungutse bizabafasha kurushaho gusohoza neza inshingano zabo no kugira uruhare mu kubungabunga umutekano n’ituze bya Repubulika ya Centrafrique.
Sous-Lieutenant Christ Ngboundourou, umwe mu basoje imyitozo, yongeye gushimangira ko yiyemeje gushyira mu bikorwa ubumenyi yungukiye mu Rwanda, kugira ngo arinde igihugu cye n’abaturage ba Repubulika ya Centrafrique
Mu mezi atandatu y’iyi myitozo y’ibanze y’ibikorwa bya gisirikare bidasanzwe, abayitabiriye bungutse ubumenyi buhanitse mu mayeri ya gisirikare akenewe muri ibyo bikorwa. Harimo kurasa ku ntego hakoreshejwe intwaro nto n’izifashishwa mu gushyigikira ibikorwa by’urugamba, kurwanisha amaboko, kwambuka imigezi n’andi mazi, gusoma amakarita ya gisirikare no gukora ibikorwa bya gisirikare hifashishijwe kajugujugu, hamwe n’ubundi bumenyi bwihariye.
Isozwa ry’iyi myitozo ni intambwe ikomeye mu kongerera abasirikare ba FACA ubunyamwuga. Rinashimangira ubufatanye bumaze igihe hagati y’u Rwanda na Repubulika ya Centrafrique mu by’ingabo, by’umwihariko mu myitozo ya gisirikare, kongerera abasirikare ubushobozi no guteza imbere ubunyamwuga bwabo.
