Umunyamideli akaba n’icyamamare ku mbuga nkoranyambaga, Zari The Boss Lady, yatangaje ko aherutse gukoresha $10.000 (asaga miliyoni 14 Frw) mu kwibagisha isura ye kugira ngo isubirane itoto, ahamya ko abifata nk’ishoramari mu mwuga we kuko acuruza uko agaragara.
Mu kiganiro na BigEyeUG, Zari yavuze ati: “Yego ni ishoramari, nakoresheje ‘temporal lift’. Ntabwo ari ukwibagisha bizwi nka ‘face lift’, babishakishe kuri Google. Amafaranga yo agenda ari menshi, birahenda cyane. Si icyaha, ni byiza cyane ko abantu bagaragara neza.”
Mu kubaga ibice byo mu maso hagamijwe kugabanya ibimenyetso byo gusaza, *temporal lift* na *full facelift* biratandukanye bitewe n’agace kabagwa n’uburyo impinduka zigaragara mu maso.
Temporal lift (kubaga igice cyo ku mpande z’amaso hafi y’amatwi no hejuru y’uruhanga) ahanini igamije kuzamura igice cyo hejuru cy’isura, cyane cyane kugabanya ukumanuka k’uruhu rwo ku nkengero z’amaso no gutuma amaso asa n’azamutse neza.
Ni uburyo bwibanda ku gice gito kandi busanzwe bugira igihe gito cyo gukira.
Full facelift yo ni ukubaga igice kinini cy’isura, bikorwa hazamurwa ndetse hagatunganywa uruhu n’imitsi yo ku matama, urwasaya (jawline) no ku ijosi, bigamije kugabanya iminkanyari, uruhu rwamanutse n’ibimenyetso byinshi byo gusaza ku maso hose.
Uyu mubyeyi w’abana batanu yanashishikarije abagore bafite ubushobozi bwo kwibagisha bakongera ubwiza kutazuyaza kubikora niba bibafasha kwigirira icyizere. Ashimangira ko nta soni bikwiye gutera.
Zari azwi cyane nk’umwe mu bategura ibirori by’imyidagaduro. Yamenyekanye cyane ubwo yakundanaga n’umuhanzi w’icyamamare Diamond Platnumz, banashyingiranywe nyuma bakaza kubyarana abana babiri mbere yo gutandukana.
Mu minsi ishize Zari yanavuzweho ko yaba yaribagishije ikibuno, ibizwi nka Brazilian Butt Lift (BBL), gusa ibyo yarabihakanye.
