Vava yavuze ko amaze igihe ahura n’ihohoterwa rikomeye akorerwa n’umukunzi we Yampano, aho amushinja kumugonga, kumukubita, kumuruma izuru ndetse no kumutera ubwoba ko yazamwica cyangwa akiyahura naramuka amureze.
Ibi byagarutsweho cyane ku wa Gatandatu mu kiganiro cya live cyakozwe na Godfather, aho Vava yagaragaje amafoto n’amashusho byerekana ibikomere yatewe n’uwo mugabo. Muri ibyo harimo ifoto y’izuru rye rifite ibikomere bikomeye, amashusho agaragaza ibipfuko ku mubiri ndetse n’andi mashusho bivugwa ko agaragaza Yampano ari gukoresha ibiyobyabwenge.
Nk’uko Vava yabivuze, ikibazo cyafashe indi ntera tariki ya 24 Werurwe 2026 ubwo yari kumwe na Yampano mu modoka bagiye muri sauna. Yavuze ko batumvikanye nyuma yo kumusaba kudakoresha telefone ari gutwara imodoka, ibintu ngo byarakaje Yampano kugeza ubwo amusabye gusohoka mu modoka.
Vava yavuze ko amaze gusohoka yafashe moto, ariko nyuma y’akanya gato abona imodoka ya Yampano ibakurikiye. Yagize ati: “Natekerezaga ko agiye kumbwira ngo nsubire mu modoka, ariko yahise yongera umuvuduko aratugonga.”
Uyu mukobwa yavuze ko iyo modoka yabagonze ku bushake, bikamuviramo ibikomere ku maguru, ku kiganza no ku matako, ndetse ko we n’umumotari bari hafi kubura ubuzima.
Nyuma y’iyo mpanuka, yavuze ko atahise arega kubera intege nke yari afite ndetse n’izindi nshingano. Yavuze kandi ko Yampano yamusabye imbabazi aramubabarira, ariko ihohoterwa rikomeza.
Amakuru akomeza avuga ko Yampano yamujyanye kwa muganga nyuma y’iyo mpanuka, ariko ngo avuyeyo amufungirana mu nzu ndetse anamwaka telefone kugira ngo atazamurega.
Vava yanagaragaje ubutumwa bw’amagambo avuga ko yandikiwe na Yampano, harimo ubwo yamubwiraga ko naramuka amushyikirije Rwanda Investigation Bureau, yahita yiyahura.
Mu byo yashyize hanze harimo amafoto y’ibikomere bikomeye ku mubiri, ifoto y’izuru rye rifite ibikomere ndetse n’amashusho bivugwa ko agaragaza Yampano ari gukoresha ibiyobyabwenge birimo urumogi n’ibinini bya “tropical”.
Nyuma y’ibi byose, amakuru avuga ko Yampano yagiye mu Karere ka Rubavu mbere yo gusubira i Kigali nyuma yo guhamagazwa n’inzego z’ubugenzacyaha.
Kugeza ubu, biravugwa ko dosiye y’iki kibazo iri mu butabera, ndetse iperereza rikaba rigikomeje.
Iyi nkuru yongeye kuzamura impaka ku ihohoterwa rikorerwa mu ngo no mu mubano w’abakundana, aho bamwe bagereranyije iki kibazo n’icya Sky2 uherutse gufungwa akurikiranyweho kuruma ugutwi k’umugore we.
Abakoresha imbuga nkoranyambaga bavuga ko ibi bikorwa bikomeje kugaragara ari ikimenyetso cy’uko hakenewe ingamba zikomeye zo kurwanya ihohoterwa no kurengera abahohotewe.
