Abantu benshi bakundaga kuvuga ko urukundo rwa Cia rwari nk'inzozi kuri bo kuko we n'umukunzi we bahoranaga inseko mu buzima bwabo, bagasangira ibihe byiza, ndetse benshi bakabafata nk'urugero rw'abashakanye babanye neza muri icyo gihe.
Nyuma y'igihe, bombi bafashe umwanzuro wo kubaka urugo. Ubukwe bwabo bwitabiriwe n'inshuti n'abavandimwe, bose babifuriza ubuzima bwiza n'urukundo ruzahoraho iteka nk'uko na we ubayeho ubu hamwe n'uwo mwashakanye.
Ariko uko imyaka yagiye ishira, ibibazo byatangiye kwiyongera.
Kutumvikana ku bintu bitandukanye, akazi kenshi ndetse n'igitutu cy'ubuzima byatumye umubano wabo ugenda uzamo icyuho, bagira gushwana no gutongana bya hato na hato , hakabura usaba imbabazi cyangwa ngo ace bugufi. N'ubwo bagerageje kubikemura, byaje kurangira bafashe icyemezo cyo gutandukana mu bwumvikane.
Nyuma yo gutandukana, Cia yanyuze mu bihe bikomeye.
Yabanje kwiheba no kubabara kubera uko ibintu byagenze, ariko ntiyemera ko ubuzima bwe bugarukira muri ako gahinda. Yafashe umwanya wo kwiyubaka, yongera kwegera inshuti n'umuryango, anibanda ku nzozi ze.
Mu butumwa yasangije abakunzi be, yavuze ati: "Hari ibihe ubuzima bukwigisha kwakira impinduka.
Nubwo umutima ubabara, ejo hazaza haba hagitegereje umuntu utacitse intege. "
Uyu munsi, Cia aracyakomeza urugendo rwo kongera kubaka ubuzima bwe. Inkuru ye yibutsa benshi ko gutsindwa mu rukundo mukageza aho gutandukana, bidasobanura iherezo ry'ubuzima bwawe, ahubwo ko bishobora kuba intangiriro y'urundi rugendo rwuzuye ibyiringiro by'ejo hazaza.
