Umuhanzikazi
Taylor Swift
yatangaje ko yandikiye indirimbo y'umwimerere filime itegerejwe na benshi, Toy
Story 5, izasohoka muri uku kwezi kwa Kamena.
Iyi ndirimbo
yise “I Knew It, I Knew You” izajya ku rutonde rw'indirimbo
zigize amajwi (soundtrack) y'iyi filime ya gatanu mu ruhererekane rwa Toy
Story, ikaba iteganyijwe gusohokana na filime ku wa 19 Kamena 2026.
Mu butumwa
yashyize ku rubuga rwa Instagram, Swift yagaragaje ibyishimo byo kuba yagize
uruhare muri iyi filime yakuranye akunda.
Yagize ati: “Nahoraga
nifuza cyane kuzabona amahiwe yo kwandika kuri aba bantu nakundaga cyane nkiri
muto, kuva nkiri umwana w’imyaka 5 ndeba filime ya mbere ya TOY STORY.”
Yakomeje avuga
ko nyuma yo kubona imwe mu myiteguro ya mbere y'iyi filime, yahise aterwa
ishyaka ryo kuyandikira indirimbo.
Ati: “Nagize amahirwe yo
kureba Toy Story 5 ikiri mu ntangiriro z'itunganywa ryayo, kandi nahise
nyikunda cyane. Maze ngeze mu rugo nyuma yo kuyireba, nahise nandika iyi
ndirimbo.”
Yongeyeho ati: “Hari igihe umuntu ahita abimenya ako kanya, si byo?"
Abasesenguzi
mu muziki wa sinema bavuga ko iyi ndirimbo ishobora guha Taylor Swift amahirwe
yo kubona bwa mbere nomination mu bihembo bya Academy Awards (Oscars)
mu cyiciro cy'indirimbo nziza y'umwimerere yakorewe filime.
Mu myaka
yashize, umuhanga mu muziki Randy Newman yagiye atoranyirizwa
Oscars kubera indirimbo zose z'ingenzi yakoreye filime za Toy Story,
harimo n'iyo yegukanye igihembo mu 2011.
Itangazwa
ry'iyi ndirimbo rije nyuma y'iminsi mike abafana ba Taylor Swift bibaza niba
koko azagaragara muri Toy Story 5. Ibyo byashimangiwe n'ibarura
ry'iminsi (countdown) ryashyizwe ku rubuga rwe, ryari rifite amashusho
n'ibimenyetso byerekeza kuri iyi filime.
Pixar nayo
yari imaze iminsi itanga ibimenyetso byerekana ko Swift ashobora kuba afitanye
isano n'uyu mushinga, harimo ibyapa byamamaza byagaragaye mu bice bitandukanye
by'isi ndetse n'amashusho agaragaza umukinnyi Jessie abyina iruhande rwabyo.
Muri imwe mu
nyandiko za Pixar, handitseho amagambo agira ati: “"Arimo
guhanga ayo mayeri uko agenda akora!”, ashingiye ku ndirimbo
ya Swift yamenyekanye cyane, Shake It Off.
Filime Toy
Story 5 izongera kugaragaramo abakinnyi b'inararibonye nka Tom
Hanks na Tim Allen, bazakomeza gukina amajwi ya Woody
na Buzz Lightyear.
Inkuru yayo
izibanda ku rugamba rw'ibi bikinisho bishaje bishaka kongera kwigarurira
umwanya wo gukinwaho n'abana, mu gihe bihanganye n'ikoranabuhanga rishya ririmo
tablet yitwa Lilypad.
Si ubwa mbere
Taylor Swift akora ku mushinga wa sinema y'abana. Mu 2012 yatanze ijwi muri
filime The Lorax, anagira uruhare mu ndirimbo zitandukanye
zakoreshejwe muri filime zikomeye mu myaka yashize.
Ibi bibaye mu gihe album ye iheruka, The Life of a Showgirl, yakomeje gukora amateka ku rutonde rwa Billboard 200, aho yamaze ibyumweru 12 iyoboye izindi album zose muri Amerika
Umwanditsi: Eddy Uwayo
