Umuhanzi w’Umunyamerika Ray J yongeye kujyanwa mu bitaro nyuma yo kugira ikibazo mu buryo butunguranye ubwo yari ari gukora ‘Livestream’.
Uyu muhanzi w’imyaka 45, amazina ye nyakuri akaba ari William Ray Norwood Jr., yari ari muri sitidiyo ya Fab Factory i Los Angeles ku wa Kane tariki ya 1 Ukwakira 2026, ari kumwe na nyina, Sonja B. Norwood, ubwo yagiraga icyo kibazo.
Nk’uko TMZ yabitangaje, Ray J yahise ajyanwa mu bitaro n’imodoka itwara abarwayi. Ku wa Gatandatu tariki ya 3 Ukwakira, umuvugizi we Melinda Santiago yabwiye USA TODAY ko Ray J akiri mu bitaro kandi ko “arimo kuruhuka.”
Si ubwa mbere Ray J ajyanwa mu bitaro muri uyu mwaka kuko muri Mutarama 2026, yagize ikibazo gikomeye cy’ubuzima nyuma yo kurwara umusonga ukomeye, ari na bwo yaje gutangaza ko abaganga bari basanze umutima we ufite ikibazo gikomeye.
Mu mashusho yashyize hanze ku wa 25 Mutarama, Ray J yavuze ko umutima we wari usigaye ukora ku kigero cya hafi 25%. Icyo gihe yavuze ko nubwo ubuzima bwe butari bwifashe neza, yari afite icyizere ko azagenda akira.
Yagize ati:“Igihe cyose nkomeje kwibanda ku kintu cyiza kandi nkaguma ku murongo mwiza, byose bizagenda neza.”
Mu butumwa butandukanye yagiye atanga ku bikorwa bye, birimo gahunda yakoreraga kuri Zeus Network, Ray J yashimiye ababyeyi be, mushiki we Brandy n’abandi bamufashaga, anavuga ko ubuzima bwe “butameze neza.”
Inkuru ya USA TODAY yagaragaje ko kimwe mu bishobora gusobanura amagambo Ray J yavuze ku mikorere y’umutima ari igipimo kizwi nka ejection fraction (EF).
Ku wa 7 Mutarama 2026, TMZ yatangaje ko Ray J yari yarajyanywe mu bitaro i Las Vegas kubera umusonga ukomeye ndetse afite n’ububabare bwo mu gituza.
Kugeza ubu, umuvugizi wa Ray J ntiyatangaje mu buryo burambuye ikibazo yagize cyatumye ajyanwa mu bitaro ku wa Kane, cyangwa niba gifitanye isano n’ibibazo by’umutima yari yaragize mbere.
Ray J yakunzwe cyane mu muziki no mu biganiro byo kuri za televiziyo, aho yagaragaye no muri gahunda nka “For the Love of Ray J” na “Love & Hip Hop.”
