Perezida Kagame yaburiye abantu bagicuruza ibyuma avuga ko bitazihanganirwa

Umukuru w’Igihugu cy’u Rwanda Paul Kagame yavuze ko Leta y’u Rwanda itazongera kurebera abenga cyangwa bakwirakwiza inzoga zitujuje ubuziranenge, zirimo izwi nka “ibyuma”, kuko zikomeje guteza urupfu n’ibibazo by’ubuzima ku Banyarwanda.

Ibyo yabitangarije mu kiganiro n’abanyamakuru cyabaye ku wa 24 Kanama 2026, Perezida Kagame yavuze ko ikibazo cy’ibinyobwa byica abantu kigomba gufatwaho ingamba zikomeye, mbere yo gutekereza ku bihombo inganda cyangwa abakozi bazo bashobora kugira.

Yavuze ko hari ibinyobwa bitemewe kandi bidafite ubuziranenge byagiye bihitana abantu benshi, ashimangira ko Leta idashobora kwemera ko abantu bakomeza gupfa mu gihe hari abungukira muri ibyo bikorwa.

H.E Paul Kagame mu magambo ye asubiza yagize ati: “Byica abantu, byishe abantu ndetse batagira umubare. Niba mukurikira amakuru [...] Barapfa ari 20, 30, 50, hari ubwo hapfuye abari hafi kugera mu 100 ku munsi umwe.”

Paul agame kandi yavuze ko mbere yo kureba ku nganda n’imirimo ishobora gutakara kubera gufunga abakora ibyo binyobwa, hagomba kubanza kurebwa ikibazo cy’ubuzima bw’Abanyarwanda.

Umukuru w’Igihugu cy’u Rwanda yanagarutse ku nshingano za Rwanda FDA na Rwanda Standards Board (RSB), avuga ko abakozi cyangwa abayobozi baba bafite uruhare mu bikorwa byo kwemerera cyangwa kugenzura ibinyobwa bitujuje ubuziranenge na bo bagomba kubazwa ibyo bakoze.

Yagize ati: “Njyewe ni ko ntekereza ariko noneho bazabyisubiriza, igihe bakurikiranyweho ibyo ngibyo. Ni bo bazabisubiza, nta wundi uzabibasubiriza.”

Umukuru w’Igihugu kandi yavuze ko Leta izakomeza guhangana n’abakora n’abakwirakwiza ibiyobyabwenge n’ibinyobwa bitemewe, cyane cyane ibihitana abantu bakiri bato.

Yashimangiye ko abari muri ibyo bikorwa bakwiye kwitegura ko Leta izabakurikirana, ati: “Ababirimo babyitege, abo bo turaza guhangana na bo nyine. Ibintu biraza kujya ku murongo uko bikwiye.”

Ibi bibaye mu gihe RIB yatangaje ko hari ba nyir’inganda, abakozi bazo ndetse n’abayobozi n’abakozi bamwe bo muri Rwanda FDA bakurikiranyweho uruhare mu gukora inzoga zitujuje ubuziranenge no mu byaha bifitanye isano no kugenzura ubuziranenge bwazo.

Perezida Kagame yavuze ko nubwo hari abashobora kunenga uburyo bamwe mu bakurikiranywe bagaragajwe, ibyo bidakwiye gutuma ikibazo nyir’izina cyo kurwanya ibinyobwa byica abantu kidakurikiranwa.