Sanga:
Umunya-Espagne Pau Martí w’imyaka 21, ukinira Ikipe ya NSN Devo Team yo mu Busuwisi, yegukanye agace ka Kabiri ka Tour du Rwanda 2026, nyuma yo amasaha atatu, iminota 10 n’amasegonda 10. Kuri uyu wa Mbere tariki ya 23 Gashyantare 2026, ni bwo hakinwe agace ka kabiri ka Tour du Rwanda 2026. Abasiganwa bahagurukiye i Nyamata mu Karere ka Bugesera basoreza i Huye, banyuze mu ntera ya kilometero 134,6. Isiganwa ryatangiriye imbere y’Ibiro by’Akarere ka Bugesera i Nyamata, aho ibihe byatangiye kubarwa bakigera ku muhanda ugana kuri Stade ya Bugesera. Ni inshuro ya karindwi kuva mu 2015 iri rushanwa rinyuze i Nyamata, ndetse ni inshuro ya kane iri siganwa ritangiriye aho, kuva ryaba mpuzamahanga mu 2009. Amanota y’umusozi wa mbere yatangiwe i Nyamiyaga ku kilometero cya 83,9, yegukanwa n’Umudage Heidemann Miguel wa Rembe Rad-Net. Umusozi wa kabiri i Gasoro ku kilometero cya 96,3 wegukanwe na Martins Paul.Mu bilometero bibiri bya nyuma, abasiganwa bagiye gutegura isprint yo ku musozo, bashaka uko bagabanya ibihe ku bayoboye. Pau Martí ni we wahize abandi ageze ku murongo mbere, atsinda agace. Yakurikiwe n’abandi bakinnyi icyenda banganyije ibihe, barimo Mulueberhan Henok w’ikipe y’igihugu ya Eritrea na Cuylits Mauro wa Lotto-Groupe Wanty. Iyi ni intsinzi ya kabiri yikurikiranya ya NSN Devo Team, nyuma y’uko Itamar Einhorn bakinana yari yegukanye agace ka Rukomo (Gicumbi) – Rwamagana ku munsi wabanje.Mu bakinnyi b’Abanyarwanda, Nsengiyumva Shemu wa Team Rwanda ni we warushije abandi, asoreza ku mwanya wa 20, arushwa n’uwatsinze umunota umwe n’amasegonda 39. Pau Martí yahise yambara umwambaro w’umuhondo nyuma yo gutsinda aka gace, awambuye Itamar Einhorn bakinana. Ibyo byaturutse ku masegonda 10 y’inyongera yabonye muri sprint yo ku murongo usoza isiganwa i Huye. Itamar ntiyasoje mu bakinnyi 40 ba mbere, aho kugeza kuri uwo mwanya, yari arushwa amasegonda 11 na Martí Pau mu bihe rusange. Tour du Rwanda 2026 izakomeza ku wa Kabiri tariki ya 24 Gashyantare, hakinwa agace ka gatatu. Abasiganwa bazahagurukira i Huye saa tanu za mu gitondo, basoreze i Rusizi banyuze mu ntera ya kilometero 145,3.
