Sanga:
Itsinda ry’Ingabo z’u Rwanda z’Abahanga mu by’Ubwubatsi (RDF Engineer Contingent) ziri muri Jamaica ryifatanyije n’abashinzwe ubwubatsi mu Ngabo za Jamaica (JDF Engineers) mu gikorwa cy’umuganda cyabereye ku kigo cyita ku bana bafite ubumuga cyitwa Blessed Assurance Institution. Iki gikorwa cyabaye ku wa 1 Werurwe 2026, kiri muri gahunda y’ibikorwa by’Ingabo z’u Rwanda zagiye muri Jamaica gufasha abaturage bagizweho ingaruka n’inkubi y’umuyaga yiswe Hurricane Melissa, yangije ibikorwa remezo n’inzu z’abaturage mu minsi ishize. U Rwanda rwohereje iri tsinda ku wa 14 Mutarama 2026, hagamijwe gusana ibyangiritse no gutera inkunga imiryango itishoboye. Muri uwo muganda, RDF na JDF bafatanyije gusiga amarangi mu byumba by’amashuri no mu byumba byo kuraramo, ndetse batunganya ibikorwaremezo byari byangiritse. Ibi byakozwe ku bufatanye n’ibitaro bya Kaminuza ya West Indies, ishami rya Tony Thwaites Wing, mu rwego rwo kunoza imibereho n’imyigire y’abana bo muri icyo kigo. Umuyobozi w’itsinda rya RDF, Col Moses Kayigamba, yashimiye ubufatanye bwagaragajwe n’abitabiriye uwo muganda. Yasobanuye ko umuganda ari umuco w’u Rwanda ushingiye ku gukorera hamwe no guteza imbere imibereho myiza y’abaturage. Yavuze ko kuwukorera no mu mahanga ari uburyo bwo gusangiza amahanga uwo muco no gukomeza umubano mwiza hagati y’ibihugu. Umuyobozi wa Blessed Assurance Children’s Home, Dalmas Agan, yashimiye RDF na JDF ku nkunga n’ubwitange bagaragaje. Yavuze ko abana bazungukira ku byakozwe, cyane cyane mu bijyanye n’imyigire n’imibereho ya buri munsi. Iki gikorwa cyagaragaje ubufatanye bwiza hagati y’u Rwanda na Jamaica, ndetse kigaragaza uruhare rw’Ingabo z’u Rwanda mu bikorwa by’ubutabazi no kubaka ubushobozi bw’abaturage mu bihe by’ibiza.
