Leta ya Iran yatangaje ko idashaka kugirana ibiganiro na Leta Zunze Ubumwe za Amerika nyuma y’uko imirwano itangiye ku wa 28 Werurwe 2026 ikomeje gufata indi ntera. Ubuyobozi bwa Iran bwavuze ko buzakomeza kwisubiza ku bitero byagabwe ku gihugu cyabwo, bunavuga ko iyi ntambara ishobora guteza igihombo gikomeye cyane ku basirikare ba Amerika. Amakuru aturuka mu bitangazamakuru mpuzamahanga arimo Reuters agaragaza ko impande zombi zikomeje kurasana ubutitsa.
Iran iri kugaba ibitero ku birindiro bya Amerika biri mu bihugu bitandukanye byo mu karere k’Uburasirazuba bwo Hagati birimo Qatar, Kuwait na Leta Zunze Ubumwe z’Abarabu. Ibi byatumye impungenge ziyongera ko iyi ntambara ishobora kumara igihe kirekire kandi igahungabanya umutekano w’akarere kose. Ku ruhande rwa Iran, hatangajwe ko ibitero bya Amerika bifatanyije na Israel byahitanye abantu benshi.
Iran ivuga ko abarenga 200 bamaze gupfa naho abarenga 700 bakomeretse. Mu bindi bihugu byibasiwe n’iyi mirwano na ho havuzwe abantu bapfuye n’abakomerekejwe. Muri Israel na ho hari abantu bishwe abandi barakomereka.
Perezida wa Amerika, Donald Trump, yatangaje mu butumwa bw’amashusho yanyujije ku rubuga rwe rwa Truth Social ko igikorwa cyo kugaba ibitero kuri Iran cyari kigamije kurinda umutekano wa Amerika. Yavuze ko ubutegetsi bwa Iran bushinjwa gutunga intwaro zifite ubushobozi bwo kurasa kure cyane ndetse n’intwaro kirimbuzi, ibintu yabonye nk’ikibazo gikomeye ku mutekano wa Amerika. Yanagaragaje ko yishimiye ibitero byahitanye Umuyobozi w’Ikirenga wa Iran, Ayatollah Ali Khamenei, hamwe n’abandi bayobozi bakuru.
Iran yakomeje guhakana ibyo ishinjwa byo gutunga intwaro kirimbuzi, ivuga ko ibyo birego ari urwitwazo rwo kuyigabaho ibitero. Umunyamabanga w’Inama Nkuru y’Umutekano ya Iran, Ali Larijani, yatangaje ko igihugu cye kibabajwe n’urupfu rw’Umuyobozi w’Ikirenga, ariko asezeranya ko kizakomeza guhangana n’abanzi bacyo kugeza igihe bazisabira imbabazi. Muri rusange, umwuka ukomeje kuba mubi mu karere k’Uburasirazuba bwo Hagati no ku rwego mpuzamahanga.
Ibihugu byinshi bikomeje gukurikirana uko ibintu bihagaze, mu gihe hari abashishikariza impande zombi guhagarika imirwano no gushaka inzira y’amahoro mbere y’uko ibintu birushaho gufata indi ntera.
