Ikipe ya APR FC yegukanye Igikombe cy’Amahoro nyuma yo gutsinda Rayon Sports kuri penaliti enye kuri ebyiri, mu mukino wari warangiye amakipe yombi anganya igitego kimwe kuri kimwe. Umukino wabaye kuri uyu wa Gatandatu tariki ya 23 Gicurasi 2026 guhera saa kumi n’ebyiri kuri Stade Amahoro.
Amakipe yombi yatangiranye ishyaka ryinshi ndetse n’ubushake bwo gutsinda, hagaragaramo amakosa menshi nk’ibisanzwe mu mukino uhuza amakipe afatwa nk’abakeba mu Rwanda.
Ku munota wa 43, Rayon Sports yabonye penaliti iturutse ku ikosa umuzamu wa APR FC, Hakizimana Adolphe, yakoreye Rony Kitoga. Penaliti yatewe na Ndikumana Asman maze ayinjiza neza, Rayon Sports ibona igitego cya mbere. Igice cya mbere cyongeweho iminota 3 kirangira Rayon Sports iyoboye n’igitego kimwe ku busa bwa APR FC.
Mu gice cya kabiri, amakipe yombi yagarukanye abakinnyi bose nta mpinduka zakozwe. APR FC yagarukanye imbaraga nyinshi ishaka kwishyura. Ku munota wa 49, William Togui yatsinze igitego cyo kwishyura ku mupira mwiza wari uzamuwe na Ruboneka Jean Bosco, awushyiraho umutwe uruhukira mu izamu.
Umukino warangiye amakipe anganya igitego kimwe kuri kimwe, hitabazwa penaliti kugira ngo haboneke ikipe yegukana igikombe.
Emery Bayisenge ni we watangiye gutera penaliti ku ruhande rwa Rayon Sports maze arayinjiza. Ku ruhande rwa APR FC, Hakim Kiwanuka na we yahise ayitsinda. Umuzamu wa Rayon Sports, Kwizera Olivier, yakurikiyeho ariko atera umupira hanze y’izamu. Byiringiro Jean Gilbert Kagege wa APR FC yahise atsinda penaliti ye.
Ndikumana Asman wa Rayon Sports yakurikiyeho, ariko penaliti ye ifatwa na Hitimana Adolphe wa APR FC. Kapiteni wa APR FC, Niyomugabo Claude, yahise atsinda indi penaliti. Mugisha Didier wa Rayon Sports na we aratsinda.
Umuzamu wa Rayon Sports, Kwizera Olivier, yari asigaranye amahirwe yo gukuramo penaliti zombi zari zisigaye kugira ngo ikipe ye igire amahirwe yo kwegukana igikombe, ariko Denis Omedi yahise atsinda penaliti ya nyuma, biha APR FC kwisubiza Igikombe cy’Amahoro yari yaratwaye no mu mwaka ushize.
Ni igikombe cya 15 APR FC itwaye nyuma y’ibihe bitandukanye birimo 1994, 1996, 1999, 2000, 2002, 2006, 2007, 2008, 2010, 2011, 2012, 2014, 2017, 2025 na 2026. Muri uyu mwaka w’imikino, APR FC imaze gutwara ibikombe bibiri.
APR FC kandi ifite ibikombe bya Shampiyona y’Igihugu birenga 24, ibikombe bitatu bya CECAFA Kagame Cup ndetse n’ibikombe bibiri by’Intwari (Heroes Cup). Kuva Stade Amahoro yavugururwa, Rayon Sports ntirabasha kuhatsindira APR FC.
Ibyifuzo by’abasomyi
