Umuherwe wa mbere ku isi, Elon Musk yavuze ko mu myaka iri imbere, kwizigamira amafaranga y’izabukuru bishobora kutazongera kugira akamaro nk’uko bisanzwe bizwi. Mu kiganiro yagiranye na Peter Diamandis kuri podcast yitwa “Moonshots with Peter Diamandis”, Musk yasabye abantu kudahangayikishwa cyane no kuzigama amafaranga y’igihe kirekire, agira ati: “ntibikwiye guhangayikisha cyane kuzigama amafaranga y’izabukuru mu myaka 10 cyangwa 20 iri imbere kuko bishobora kutazaba bigifite akamaro. ” Yasobanuye ko impamvu atari inama ku micungire y’imari gusa, ahubwo ishingiye ku iterambere rikomeye ry’ikoranabuhanga, cyane cyane mu by’ubwenge buhangano (AI), iterambere ry’ikoreshwa ry’ama robo ndetse n’ingufu.
Ibi bishobora gutuma ubuzima burushaho koroha ku buryo amafaranga n’umushahara bitazaba bikiri ingenzi mu kubona serivisi z’ingenzi nko kwivuza, kwiga no kubaho neza. Musk agaragaza ko ejo hazaza hashobora kuzaba hari ubukungu bushingiye ku bwinshi, aho abantu benshi bazabona serivisi ku buryo bwagutse, ubuvuzi bukarushaho kuba bwiza, ndetse n’akazi kakaba katanagomba kuba ngombwa, kuko robo n’imashini zifite ubwenge zizaba zishobora gukora imirimo myinshi. Muri iyo miterere, igitekerezo cy’izabukuru gishobora guhinduka, kikaba kitakiri iherezo ry’ubuzima bw’akazi rishingiye ku mafaranga wizigamiye imyaka myinshi, ahubwo kikaba ari igitekerezo cyashaje gishingiye ku buryo bw’akazi bwa kera.
Ariko kandi, ibi Musk avuga si byo biriho ubu. Kugeza ubu, ingo nyinshi ziracyahanganye no kuzigama n’utwo zifashisha mu bihe byihutirwa. Urugero, imyenda ku makarita ya banki muri Leta Zunze Ubumwe za Amerika yageze kuri tiriyoni 1.
23 z’amadolari mu gihembwe cya gatatu cya 2025, mu gihe benshi badafite n’amafaranga ahagije y’ingoboka. Ibi bigaragaza ko kuzigamira izabukuru atari ukureba gusa igihe cy’izabukuru, ahubwo ari no kwitegura ibibazo bishobora kubaho nk’ubushomeri, indwara, cyangwa izamuka ry’ibiciro by’imibereho. Abahanga mu bukungu bavuga ko nubwo AI ishobora kuzana imirimo mishya, ishobora no gusimbura iyari isanzweho ku buryo bwihuse.
Raporo ya Morgan Stanley yo mu 2026 igaragaza ko imirimo mishya izavuka, ariko hari impungenge ko AI ishobora no gusimbura ubushobozi bw’abantu mu mirimo y’ubwenge, bigatuma kwiga indi mirimo mishya bigorana. Ku rundi ruhande, impuguke zitandukanye zifite ibitekerezo bitandukanye ku hazaza. Hari ababona ko AI izazana iterambere mu buvuzi, uburezi n’ibikorwaremezo, mu gihe abandi batinya ko ishobora kongera ubusumbane mu bukungu, kugabanya ubwisanzure bw’abantu no guteza ibibazo by’umutekano w’amakuru.
Muri rusange, igitekerezo cya Musk gitera impaka kuko gihuza ejo hazaza hashobora kuzana ubukungu bwuzuye n’ubu buzima abantu barimo, aho kwizigamira bikiri ingenzi cyane. Nubwo ejo hashobora kuzaba heza, kugera aho bisaba igihe, amafaranga n’imbaraga nyinshi, bityo abantu bakaba bagikeneye gukomeza kwitegura neza ejo hazaza habo.
