U Rwanda rugiye kwakira ku nshuro ya mbere ibirori byo gutanga ibihembo bya Shining Stars Africa Awards 2026, bisanzwe bitangirwa muri Afurika y’Epfo. Muri ibi birori hazitabira abahanzi nyarwanda barimo Bruce Melodie na The Ben. Abategura iri rushanwa babitangaje banyuze ku mbuga nkoranyambaga zabo, berekana urutonde rw’abahanzi bo mu bihugu bitandukanye bazataramira abazitabira ibi birori.
Mu bahanzi mpuzamahanga bazasusurutsa abazabyitabira harimo TopCheri wo muri Namibia, Prince Luv wa Zambia, Bossgia na Zyrah bo muri Tanzania, Shana Sierra na Noela bo muri Uganda, Pheno Boy wo muri DRC n’abandi. Abamaze gushyirwa ku rutonde rw’abahatanira ibihembo barimo Mutesi Jolly, Massamba Intore, Element, Alicia & Germaine, Bruce Melodie, Kigali Protocol, Jojo, Nadia Nany, Rocky Kimomo, Passy Sweet, Bianca Baby na MC Tino. Mu banyamahanga harimo Juma Jux, Mbosso, Tanasha Donna n’abandi batandukanye.
Ibikorwa bizaranga ibi birori birimo gutanga ibihembo, kwerekana impano zitandukanye no kumurika imideri. Abanyamideli b’ikigo cya RIFI bazamurika imideri ifatanyije n’abahanga mu myambaro barimo Nunu wo mu Rwanda (Nunu Fashion Luxury), Hilda Baleni wa Skhusone’s Designs wo muri Zambia, ndetse na Mariro Umubyeyi Angèlique n’abandi. Hazabaho kandi ibiganiro bigufi ku ngingo zitandukanye zirimo ubuhanzi, imiyoborere, ubucuruzi, ikoranabuhanga na siporo.
Mu bazatanga ibiganiro harimo Massamba Intore, Mukazibera Marie Agnès wahoze ari umudepite mu Nteko Ishinga Amategeko, ndetse na Mugabo Julius uzwi mu bucuruzi bushingiye ku mbuga nkoranyambaga. Ibirori bya Shining Stars Africa Awards 2026 biteganyijwe gutangwa tariki ya 7 Werurwe 2026, bikazabera muri Olympic Hotel, aho hitezwe kwakira abantu bagera ku 1000. 
