Umugabo wawe ashobora kuba agukunda n’umutima we wose mu gihe runaka ukabona arakuretse. Hari ibintu wowe ushobora kubona nk’ibyoroshye ariko bikaba ari ingenzi ku mugabo wawe.
Twifashishije urubuga gulmu.info twaguteguriye ibintu 7 umugore akwiye kwitwararika ku mugabo we. Niba uri umugore w’umuhanga urabibika ku mutima kuko bishobora kukugirira akamaro mu mubano wawe n’uwo mwashakanye cyangwa uwo muzashakana.
Kutamwubaha: Ibi si ibanga ndetse nta n’utazi ko abagabo bakunda icyubahiro kuruta ibindi bintu byose. Icyo abagabo banga kuruta ibindi ni ukubura icyubahiro mu ruhame cyane cyane imbere y’ababyeyi, inshuti n’abandi.
Abagabo kandi banga abagore b’abanyagasuzuguro cyane cyane bamwe bakora icyo bashatse gusa batanumva icyo umugabo abavuze.
Kumuca inyuma: Ntibikunze kubaho kubona umugabo wababariye umugore wamuciye inyuma. Ni byiza ko niba uri umugore uharanira kuba umwizerwa ku mugabo wawe.
Imibonano mpuzabitsina: Burya umugore ashobora kwihanganira kumara imyaka adakora imibonano mpuzabitsina ariko ku bagabo siko bimeze kuko batabasha kubyihanganira igihe kinini.
Ni byiza ko niba uri igitsina gore wifata mbere yo gukobwa kuko bizakurinda abagabo babi ariko iyo umaze gushaka ibyo kwifata ubisiga inyuma. Ntukwiye kwanga kuryamana n’umugabo wagukoye, mukabyarana abana kandi mukaba mubana mu nzu imwe.
Ibikoresho: Abagabo ntibakunda abagore bahora babaka amafaranga cyangwa bakamara igihe cyabo cyose bababwira ibijyanye n’amafaranga. Niba umugabo akora kandi akaba agukunda azaguha icyo ukeneye cyose utarinze guhora umusaba.
Gusa nawe nk’umugore ukwiye guharanira gukora kugira ngo bizakurinde guhora waka umugabo amafaranga kuri buri kantu kose.
Igitutu: Umugabo ntakunda umuntu uhora amushyiraho igitutu cyo gukora ibintu runaka. Aba afite byinshi bimureba bishobora gutuma akureka igihe uhora umwotsa igitutu cyo kugira ibyo akora.
Ni byiza kudahora waka umugabo byinshi ahubwo ukanyurwa na bike abasha kukuha aho kumwotsa igitutu cyo kugushakira n’ibyo atabasha kubona. Burya umunezero uva mu kwakira no kunyurwa n’ibyo ubonye.
Wihora uhatiriza umugabo kuguha ibihenze cyane cyane iyo afite akazi kamunaniza, uba ukwiye kumenya ko akeneye umunezero adakwiye kuburira ku kazi ngo aburire no mu rugo.
Gasopo: Abagabo ntibakunda umuntu ubaha amabwiriza ngenderwaho aho usanga umugore akubwira ngo nutareka ibi bizagenda bitya.
Abagabo muri kamere yabo ni abategetsi abagore nabo muri kamere bakaba bagomba kubaha. Ni ngombwa ko uvugana kwicisha bugufi imbere y’umugabo aho kuvuga umuha gasopo ku bintu runaka.
Kwinubira amabwiriza n’ibitekerezo bye: Abagabo ntibakunda abagore banga gukora ibyo babasabye. Uba ugomba gukora icyo umugabo agusabye, iyo ugiye kumuburanya umuha impamvu nyinshi abifata nko kumusuzugura.
Nubwo umugabo yaba akubwiye gukora ibitari byo uba ugomba gushaka uburyo buboneye bwo kubimubwira ukavuga ucishije make kandi mu kinyabupfura aho kuvuga nk’uhanganye nawe kuri iyo ngingo.
Ibyifuzo by’abasomyi
