Mu myaka icumi ishize, umuziki nyarwanda wateye imbere mu buryo bufatika. Amashusho yararushijeho kunozwa, imbuga nkoranyambaga ziba urubuga rukomeye rwo kwamamaza, kandi abahanzi benshi batangiye kuvugwa no hanze y’u Rwanda. Iyo urebye isura rusange y’inganda y’umuziki, wabona ko hari iterambere rigaragara u Rwanda rumaze gutera.
Gusa iyo winjiye mu mibare ya YouTube, haboneka indi shusho ituma umuntu yongera gutekereza kabiri. YouTube yabaye igipimo cy’ingenzi mu kureba uko indirimbo yakiriwe. Ni ho hagaragarira umubare w’abayirebye, uko isangizwa, n’urwego igezeho mu ruhando mpuzamahanga.
Mu bihugu bifite isoko rinini ry’umuziki, kugira indirimbo zirengeje miliyoni 10 ni ibisanzwe. Ariko mu Rwanda, uwo mubare uracyafatwa nk’intambwe ikomeye cyane. Mu muziki usanzwe, uzwi nka Secular, kugeza ubu abahanzi batanu gusa ni bo bafite nibura indirimbo imwe cyangwa izirenze zarengeje miliyoni 10 kuri YouTube.
Ibi ntibisobanuye ko abandi badafite impano cyangwa ko badakora, ahubwo bigaragaza ko isoko ryacu rikiri rito kandi ritaragera ku rwego rwo hejuru ugereranyije n’ibihugu byo mu karere. Uru rutonde ruyobowe na Meddy, ufite indirimbo nyinshi zarengeje uyu mubare. Slowly ni yo iyoboye izo ndirimbo, imaze kurebwa inshuro zirenga miliyoni 100, iba imwe mu zageze kure mu mateka y’umuziki w’u Rwanda.
Akurikirwa n’izindi zirimo My Vow, Queen of Sheba, Holy Spirit, Ntawamusimbura, Nasara na Lose Control. Kuba yarakoreye umuziki mu mahanga byamuhaye amahirwe yo kubaka isoko rikomeye muri diaspora, bigira uruhare mu kuzamura imibare ye kuri YouTube. Chriss Eazy ni umwe mu bahagarariye abahanzi bashya.
Indirimbo nka Bana, Jugumila, Sekoma na Inana zose zarengeje miliyoni 10. Ibi bigaragaza imbaraga z’urubyiruko rumushyigikiye ndetse n’ihinduka ry’uburyo umuziki wakirwa muri iki gihe. YouTube yamubereye umuyoboro wo kwigarurira abafana no kwiyubakira izina mu gihe gito.
Element Eleeeh, watangiye ari producer, na we yinjiye muri uru rutonde. Fou de toi imaze kurebwa inshuro zirenga miliyoni 30, mu gihe Tombe na Kashe nazo zarengeje miliyoni 10. Uretse kuba ari umuhanzi, ni n’umutunganya w’indirimbo wamamaye cyane, ibintu byamufashije guhuza ubumenyi bwe mu gutunganya umuziki no kuwushyira ku isoko mu buryo bugezweho.
Bruce Melodie, nubwo azwi cyane mu bitaramo no mu bihembo bitandukanye, afite indirimbo nke zarengeje miliyoni 10 ugereranyije n’uko izina rye rifatwa. Katerina ni imwe mu zageze kuri uwo mubare. Ibi byerekana ko ubwamamare bwo mu gihugu bushobora kutajya bujyana n’imibare yo ku mbuga mpuzamahanga.
The Ben na we ari muri aba bahanzi batanu. Indirimbo Why yakoranye na Diamond yarengeje miliyoni 20, ikomeza kuba imwe mu zakunzwe cyane. Nubwo afite amateka maremare n’abakunzi benshi, imibare ya YouTube igaragaza ko indirimbo ze zirengeje miliyoni 10 atari nyinshi cyane nk’uko bamwe babitekereza.
Iyi mibare yose itanga isomo rikomeye ku miterere ya showbiz nyarwanda. YouTube si ahashyirwa amashusho gusa; ni igikoresho cyo gupima isoko, kubaka izina no gukurura abafatanyabikorwa. Views nyinshi zifasha mu kubona abaterankunga no kwinjiza amafaranga binyuze mu iyamamazabikorwa.
Muri rusange, kuba abahanzi batanu gusa ari bo bageze kuri miliyoni 10 kuri YouTube mu muziki usanzwe, bigaragaza ko isoko ry’umuziki w’u Rwanda rikiri rito ariko ritanga icyizere. Ni urugendo rukomeje, rukeneye imbaraga mu kwamamaza, guhanga udushya no kwagura isoko mpuzamahanga. https://youtu.
be/asZm5gHknmU? list=RDasZm5gHknmU https://youtu. be/3VLvD6KgS7A?
list=RD3VLvD6KgS7A https://youtu. be/2vDsy_5nQ7g? list=RD2vDsy_5nQ7g https://youtu.
be/nn8WTBH1OdQ? list=RDnn8WTBH1OdQ [caption id="attachment_45642" align="alignnone" width="1112"]
