Muri iyi si y’ikoranabuhanga, cyane cyane urubyiruko, bahura n’amashusho menshi ya filime z’urukozasoni, ku buryo bamwe babaye imbata zo kwikinisha n’izindi ngaruka ziterwa n’ayo mashusho.
Pornhub, urubuga rukomeye rureberwaho amashusho y’urukozasoni, ruvuga ko rusurwa n’abantu barenga miliyoni 100 ku munsi, ndetse ko abana benshi batangira kurusura ku myaka 12.Ni mu gihe Common Sense Media igaragaza ko 71% by’ingimbi n’abangavu barebye amashusho y’urukozasoni mu cyumweru cyabanjirije ubushakashatsi.
Ni ubushakashatsi bugaragaza ko ababwitabiriye babonye amashusho y’urukozasoni bwa mbere ku mpuzandengo y’imyaka 12, mu gihe 15% bayabonye bafite imyaka 10 cyangwa munsi yayo.Abagera kuri 45% bavuze ko ayo mashusho yabahaye amakuru bumva ko abafitiye akamaro ku bijyanye n’imibonano mpuzabitsina.
Abasesengura imibanire bavuga ko guhura n’ayo mashusho bishobora kugira uruhare mu guhindura imyumvire y’abakiri bato ku rukundo n’imibonano mpuzabitsina.Mu gihe ikoranabuhanga rikomeje kwinjira mu buzima bwa buri munsi, telefoni na murandasi byatumye kubona amakuru atandukanye birushaho koroha.
Ariko ubwo buryo bwo kubona amakuru bushobora no gutuma abana n’urubyiruko bagera ku mashusho y’urukozasoni, rimwe na rimwe batabishatse.Kuri bamwe, kubona ayo mashusho bishobora gutangira nk’amatsiko cyangwa ibintu bahuye na byo kuri internet, ariko bikagera aho bihinduka akamenyero.Iyo umuntu ageze aho yumva adashobora kubireka cyangwa kugenzura inshuro abirebamo, bishobora kugira ingaruka ku mibereho ye no ku mibanire ye n’abandi.
Kera, amakuru ajyanye n’urukundo n’ubuzima bw’imyororokere abana bayahabwaga n’ababyeyi, abandi bakayakura ku ishuri cyangwa mu biganiro byibandaga ku burere.Uyu munsi, telefoni ishobora gutuma umwana agera ku makuru menshi mu gihe gito.Ikibazo ni uko atari amakuru yose aba yizewe cyangwa agamije kwigisha.
Amashusho y’urukozasoni ashobora gutanga ishusho itandukanye n’ubuzima busanzwe, cyane cyane ku muntu ukiri muto utaramenya gutandukanya ibikorerwa kwidagadura n’umubano usanzwe hagati y’abantu.Mu buzima busanzwe, urukundo nti rushingira ku mibonano mpuzabitsina gusa, ahubwo rushingira no ku biganiro, kubahana, kwizerana, kumva amarangamutima ya mugenzi wawe no kubahiriza imipaka ya buri wese.
Kuri bamwe, kureba amashusho y’urukozasoni bishobora gutangira nk’ibintu bikorwa rimwe na rimwe, ariko nyuma bikazahinduka akamenyero.Umuntu ashobora gutangira kuyareba kenshi, akamara umwanya munini ayareba ndetse akagera aho kuyareka bimugora.Iyo bigeze aho bigira uruhare runini mu buzima bwa buri munsi, bishobora guhindura uko umuntu yibona ndetse n’uko abona imibanire ye n’abandi.Ku muntu uri mu rukundo, bishobora gutuma ibyo yabona kuri internet bigira uruhare runini mu mitekerereze ye, aho kwibanda ku biganiro no kumvikana n’uwo bakundana.
Ibi bishobora guteza kutumvikana hagati yabo, cyane cyane iyo umwe atangiye kwitega ko umubano wabo ugomba kumera nk’ibyo yabonye muri ayo mashusho.Ikindi kibazo ni uko amashusho y’urukozasoni ashobora gutuma bamwe mu rubyiruko bagira imyumvire itari yo ku mubiri wabo.Bamwe bashobora kwigereranya n’abagaragara muri ayo mashusho, bakumva ko na bo bagomba kugira umubiri cyangwa imyitwarire nk’ibyo babona muri izo filime z’urukozasoni.
Ibi bishobora gutuma umuntu atanyurwa n’uko ateye, ndetse akagira imyumvire itari yo ku mubiri we cyangwa ku w’umukunzi we.Ni na yo mpamvu ibiganiro ku buzima bw’imyororokere n’imibanire ari ingenzi, cyane cyane ku bana n’urubyiruko bakoresha internet.
Kubera ko kugenzura ibyo umwana abona kuri internet bitoroshye, ababyeyi n’abarezi bafite uruhare mu kumufasha kubisobanukirwa no kumenya ibikwiye.Ibiganiro bishingiye ku kuri bishobora gufasha umwana gutandukanya ibikwiye n’ibidakwiriye no kubona amakuru yizewe ku buzima bw’imyororokere.Ni ngombwa kandi kwigisha abakiri bato ko ibyo babona kuri internet bidakwiye gufatwa nk’ishusho y’ubuzima busanzwe.
Umubano w’abantu ushingira ku marangamutima, ibiganiro, kwizerana no kubahana, kandi ushobora no kurangwamo kutumvikana.Mu gihe internet ikomeje kugira uruhare runini mu buzima bw’urubyiruko, igisubizo si ukubabuza gukoresha ikoranabuhanga gusa.Ahubwo ni ukubaha ubumenyi bubafasha kumva ibyo bareba, kubitandukanya n’ubuzima busanzwe no gusobanukirwa ingaruka zabyo.
Urukundo n’umubano hagati y’abantu ntibishingira ku mbaraga z’umubiri gusa. Kubahana, kwizerana, kuganira no kwita ku marangamutima ya mugenzi wawe na byo ni ingenzi mu kubaka umubano mwiza.
