Filime The Karate Kid, yahuje Jaden Smith na Jackie Chan mu mwaka wa 2010, yinjije miliyoni zisaga 350 z’amadolari ya Amerika ku masoko ya sinema ku isi, nyuma yo gukorwa hakoreshejwe ingengo y’imari ya miliyoni 40 z’amadolari. Iyi filime yagaragaje urugendo rw’umwana wiga kung fu kugira ngo yirwanaho, inahindura uburyo benshi babonaga filime z’imirwano z’abana.
Iyi filime yasohotse ku wa 11 Kamena 2010, Jaden Smith ayikinamo ari Dre Parker, umwana wimukira i Beijing mu Bushinwa na nyina, agahura n’imbogamizi zirimo gutotezwa na bagenzi be. Jackie Chan yakinnye ari Mr. Han, umugabo ufite ubuhanga muri kung fu umufasha kwiga kwirwanaho, kwihangana no kugira ikinyabupfura. Kugira ngo yinjire neza muri iyo nshingano, Jaden yakoze imyitozo y’imirwano yamaze amezi agera kuri arindwi, harimo amezi atatu i Los Angeles n’andi ane i Beijing, nk’uko byatangajwe n’ibitangazamakuru byo muri Amerika
Nk’uko urubuga The Numbers rubika imibare y’amafaranga filime zinjiza rubigaragaza, The Karate Kid yinjije miliyoni $ 351.77 z’amadolari ku isi, harimo miliyoni $ 176.59 muri Amerika na Canada, n’izindi miliyoni $175.18 mu bindi bihugu. Mu mpera z’icyumweru cya mbere yerekanywe muri Amerika, yinjije miliyoni $55.67 z’amadolari. Nubwo amafaranga yinjije yari hafi inshuro icyenda z’ingengo y’imari yo kuyikora, ayo mafaranga ntahwanye n’inyungu nyakuri, kuko hatakuwemo amafaranga yo kwamamaza, ndetse n’abakwirakwiza filime n’ibindi bisohoka.
Icyatumye iyi filime irushaho kwibukwa ni uburyo yahuje imyitozo y’imirwano n’amasomo y’ubuzima. Mu mashusho azwi cyane, Mr. Han asaba Dre gukuramo ikoti rye, akarimanika, akarisubizaho, akabisubiramo kenshi. Dre abanza kubona ko ari igihano kidafite icyo kimwigisha, ariko nyuma akamenya ko ibyo bikorwa byari bimufasha kumenyera ingendo zo kwirwanaho. Iyi filime kandi yagaragaje kung fu yo mu Bushinwa, nubwo yagumanye izina The Karate Kid, ryari risanzwe rizwi kuva filime y’umwimerere yasohotse mu 1984.
Icyakora, amafaranga yose filime yinjije ntahwanye n’ayo Jaden Smith na Jackie Chan bahembwe ku giti cyabo. Imibare yavuzwe ku isoko rya sinema ntigaragaza amafaranga nyayo buri mukinnyi yahawe, Icyo imibare yemeza ni uko The Karate Kid yabaye umushinga w’ubucuruzi wagezweho, ugahuza ubuhanga bw’abakinnyi, imyitozo ikomeye n’inkuru yibanda ku kwihangana no kwigirira icyizere.
Icyo gihe, Jackie Chan yari afite imyaka 56, akina ari Mr. Han, umwarimu wigisha Dre Parker imikino njyarugamba,Jaden Smith, wakinnye ari Dre Parker, yari afite imyaka 11, kandi yari agiye kuzuza 12 muri Nyakanga 2010,Ubu, tariki ya 28 Ukwakira 2026, Jackie Chan afite imyaka 72, kandi aracyakora filime,Jackie Chan azwi kandi nk’umukinnyi w’imikino njyarugamba, umuyobozi wa filime, umukinnyi ukora ibikorwa bitoroshye atifashishije undi (stunts), ndetse n’umuhanzi w’umuziki,Jaden Smith ubu afite imyaka 28; akora umuziki, agakina filime, kandi akora ibikorwa by’imideli,Muri Nzeri 2025, Jaden yagizwe umuyobozi ushinzwe guhanga imideri y’abagabo muri Christian Louboutin, aho ayobora ibijyanye n’inkweto, ibikapu n’ibindi bikoresho by’imideli.
Ese wowe iyi filme wayirebye bwa mbere urihe,Wari ufite Imyaka ingahe?Andika Igitekerezo cyawe !
Ibyifuzo by’abasomyi
