Umuhanzi Peter Okoye, umwe mu bagize itsinda rya P-Square, yabwiye Urukiko Rukuru rwa Federal i Lagos ko yahawe hafi miliyoni 800 z’amadolari ($800,000) mu mafaranga y’uburenganzira bwo gukoresha no gucuranga indirimbo za P-Square, ariko avuga ko mukuru we Jude Okoye nta mafaranga yabonye kuri yo.
Peter yabivugiye mu buhamya yatanze hifashishijwe ikoranabuhanga imbere y’Umucamanza Alexander Owoeye ku wa Kabiri, ubwo yabazwaga n’umwunganizi wa Jude, Clement Onwuewunor, SAN.
Jude Okoye n’ikigo cye Northside Music Limited bakurikiranyweho ibyaha birindwi byatanzwe n’Urwego rushinzwe kurwanya ibyaha by’ubukungu n’imari muri Nigeria, EFCC kuko barimo gukekwaho, kunyereza cyangwa gukoresha nabi amafaranga angana na N1.3 billion na $1 million gusa Jude aka a ahakana ibyo aregwa.
Mu iburanisha, Peter yabajijwe ku byo yari yaravuze mbere ko Jude yatinze amezi arenga atatu kumuha inyandiko zigaragaza amafaranga yavuye mu burenganzira bw’indirimbo za P-Square, nyuma yo kuzimusaba mu 2022.
Igihe yabwirwaga ko ubusabe bwakozwe ku wa 16 Ukwakira, maze inyandiko zigatangwa nyuma y’iminsi itandatu, Peter yavuze ko yari yarabanje gukora ubundi busabe.
Gusa, ubwo yasabwaga kugaragaza ibimenyetso by’uko yari yarabanje kubisaba, Peter yemeye ko nta kimenyetso afite kandi ko atibuka neza igihe yabikoreye.
Peter kandi yemeje ko yahawe raporo y’amafaranga y’uburenganzira bw’umuziki yakusanyijwe hagati ya 2016 na 2022. Yasobanuye ko iyo raporo yari yasabwe nyuma y’uko hari abashoramari bashakaga kugura uburenganzira bwo gutunga no gukoresha umuziki wa P-Square mu bindi bintu byabo.
Peter yemeye ko yakiriye hafi $800,000 yaturutse muri SACEM, ariko ashimangira ko ayo mafaranga yari agenewe we n’impanga ye Paul Okoye, atari Jude.
Ubwo yabazwaga niba yaramenyesheje Jude ko ayo mafaranga yishyuwe, Peter yarashubije ati:“Oya, amafaranga yari ay’abahanzi.”
Peter kandi yavuze ko Jude atari umwe mu bagize P-Square, nubwo hari amashusho y’indirimbo z’itsinda yayoboye mu gihe cyashize. Yongeyeho ko we na Paul ari bo bandikaga kandi bagakora indirimbo z’itsinda.
Urukiko rwimuriye urubanza ku wa 8 n’uwa 9 Ukuboza 2026, kugira ngo iburanisha rikomeze.
