Koza amenyo cyane cyangwa ukoresheje imbaraga nyinshi ntibivuze ko uba wayasukuye neza bihagije. Abahanga mu by’amenyo bavuga ko uburyo bwo koza amenyo bushobora kugira uruhare mu kwangiza amenyo n’ishinya, cyane cyane iyo umuntu akoresha imbaraga nyinshi cyangwa ukayoza mu gihe kitari icyabyo.
DORE AMAKOSA 9 ABANTU BAKUNZE GUKORA N’UKO WAYAKOSORA:
1. Koza mu kanwa n’amazi ako kanya umaze koza amenyo: Iyo umaze koza amenyo ukoresheje umuti urimo ‘fluoride’, ntibyaba byiza uhise woza mu kanwa n’amazi menshi uri n’urimo gukora isuku n’ubundi. Kubikora bishobora gukuraho iyo ‘fluoride’ iba yasigaye ku menyo, bityo ikagabanya igihe imara ifasha kurinda amenyo kwangirika.
2. Gukoresha imbaraga nyinshi mu koza amenyo: Abantu bamwe batekereza ko gukoresha imbaraga nyinshi boza amenyo bituma amenyo arushaho kugira isuku. Ariko gukoresha imbaraga nyinshi bishobora kwangiza igice cy’amenyo kiri hafi y’ishinya, kandi bituma amenyo arushaho kugira ububabare iyo ahuye n’ubukonje cyangwa ubushyuhe by’umwihariko iyo wamenyereye kuyoza ukababaza.
Abahanga batanga inama yo gukoresha uburoso bufite utwoya tworoshye (soft bristles) no koza amenyo witonze aho kuyasukura nk’aho uri kuyasiga.Ikindi kimenyetso gishobora kukwereka ko ukoresha imbaraga nyinshi ni igihe utwoya two ku buroso dutangira gukwirakwira cyangwa kugorama (Tukamera nk’ubwatsi buryame cyangwa bwakubiswe n’umuyaga mwinshi).
3. Gukoresha ‘mouthwas’h ako kanya umaze koza amenyo: Gukoresha umuti wo koza mu kanwa (mouthwash) ako kanya nyuma yo koza amenyo bishobora gukuraho fluoride nyinshi iba isigaye mu kanwa.
Abahanga bavuga ko, niba ushaka gukoresha mouthwash irimo fluoride, ushobora gutegereza iminota byibura kuva kuri 15 na 20 nyuma yo koza amenyo. Ushobora kandi kuyikoresha mu kindi gihe, urugero nyuma ya saa sita, aho kuyikoresha ako kanya nyuma yo koza amenyo.
4. Gushyira umuti w’amenyo mwinshi cyane ku buroso: Ntibikenewe ko wuzuzaho uburoso umuti w’amenyo. Ku bantu bakuru, ingano ingana n’akabuto kamwe k’amashaza (pea-sized amount) y’umuti urimo fluoride irahagije.Gushyiraho mwinshi bishobora gutuma haboneka urufuro rwinshi mu gihe cyo koza amenyo, bigatuma umuntu ahita ashaka kurukuramo, bityo uko gukoresha amazi menshi bigakuraho burundu iyo fluoride.
5. Guhita woza amenyo nyuma yo kunywa ikawa cyangwa kurya ibirimo aside: Ibiribwa n’ibinyobwa bifite aside, harimo ikawa n’umutobe w’amacunga, bishobora kwangiza ‘enamel’ mu gihe gito.
Guhita ukoresha uburoso n’imbaraga muri icyo gihe bishobora kongera kwangiza enamel. Inama itangwa n’abahanga ni ugutegereza nibura isaha imwe nyuma yo kurya cyangwa kunywa ibintu bifite aside mbere yo koza amenyo. Mu gihe utegereje, ushobora kunywa cyangwa koza mu kanwa n’amazi.
6. Kutamara iminota ibiri woza amenyo: Abahanga batanga inama yo kumara iminota ibiri woza amenyo inshuro ebyiri ku munsi. Kumara iminota ibiri woza amenyo witonze biruta kumara amasegonda 30 uyasukura ukoresheje imbaraga nyinshi.
7. Kwibanda cyane ku menyo y’imbere ugasiga ay’inyuma: Abantu benshi bamara igihe kinini ku menyo y’imbere, ariko ntibabashe kugera ku menyo y’inyuma kuko kuyageraho bigoye.
Nyamara ‘plaque’ ishobora kwirundanya cyane ku menyo y’inyuma (molars) no hafi y’aho amenyo ahuriye n’ibindi bice bikaba byateza ikibazo gikomeye.Uburyo bworoshye ni ugutandukanya mu kanwa ibice bine ukayoza uhereye: hejuru iburyo, hasi iburyo, hejuru ibumoso na hasi ibumoso. Mara hafi amasegonda 30 kuri buri gice, kugira ngo amenyo yose abone umwanya ungana.
8. Kwibagirwa ko ishinya na yo igomba kozwa: Gusa kunyereza uburoso hejuru y’amenyo ntibihagije. Ahantu amenyo ahurira n’ishinya ni hamwe mu hantu plaque ishobora kwirundanyiriza. Abahanga batanga inama yo gushyira uburoso ku nguni ya dogere hafi 45° aho amenyo ahurira n’ishinya, hanyuma ugakoresha udutembabuzi tworoshye kandi tuzenguruka hose.
Irinde kunyereza uburoso cyane imbere n’inyuma nk’aho uri gusya, kuko bishobora gukomeretsa ishinya.Urasabwa gukoresha imbaraga nkeya cyane.
9. Kwibwira ko koza amenyo byonyine bihagije: Koza amenyo ni ingenzi, ariko ntibisukura buri hantu hose hagati y’amenyo. Ni yo mpamvu ari ngombwa gukoresha kimwe mu bikoresho bifasha gusukura hagati y’amenyo buri munsi, bitewe n’uko amenyo yawe ateye: nka dental floss, floss picks cyangwa interdental brushes.Ni byiza kandi koza ururimi witonze, kuko rushobora kugiraho udukoko n’ibisigazwa by’ibiribwa bishobora gutera umwuka mubi wo mu kanwa.
IBINDI BIBAZO ABANTU BAKUNZE KWIBAZA
Ese flossing ikorwa mbere cyangwa nyuma yo koza amenyo?
Ubushakashatsi bumwe bwagaragaje ko gukoresha floss mbere yo koza amenyo bishobora kugabanya plaque iba hagati y’amenyo kandi bigasigira fluoride nyinshi aho hantu. Ariko American Dental Association ivuga ko ushobora gukoresha floss mbere cyangwa nyuma yo koza amenyo, kandi ugakomeza kubona inyungu zo kuyikoresha.
Ese umuti w’amenyo urimo ‘Amakara’ ni mwiza mu koza amenyo?
Abahanga bavuze ko nta bimenyetso bihagije byerekana ko umuti w’amenyo arimo amakara ufite umutekano cyangwa ukora neza mu gusukura amenyo.Ese ni bibi gutosa uburoso mbere yo gushyiraho umuti w’amenyo? Oya. Abahanga bavuga ko nta bimenyetso bihagije byerekana ko gutosa uburoso mbere cyangwa nyuma yo gushyiraho umuti w’amenyo bigabanya ubushobozi bwo koza amenyo.
koza amenyo neza si ugukoresha imbaraga nyinshi. Koresha uburoso bworoshye, koza iminota ibiri, witondere aho amenyo ahurira n’ishinya, sukura hagati y’amenyo buri munsi kandi wirinde guhita woza mu kanwa n’amazi menshi umaze gukoresha umuti urimo fluoride.
