Abafana ba APR FC bakoze impanuka ikomeye

Abafana b’ikipe ya APR FC berekeje muri Tanzania gushyigikira iyi kipe mu mikino ya CAF Champions League bakoze impanuka ikomeye batari barenga umutaru.

Abafana ba APR FC bari muri Bus ya Matunda Express yagombaga kubashyikiriza indi Bus ku mupaka wa Rusumo ubwo bari barenze Rugende bahuye n’igikamyo cyari gihetse imashini ariyo yagonze igihande kimwe cyose iracyangiza.

Bane muri abo bafana nibo bakomeretse batwarwa kwa muganga n’imbangukira gutabara.

Munyarugamba Francis uzwi nka Songambele yagize ati:”Twari turenze Rugende, duhura n’igikamyo gihetse imashini niyo yangije uruhande rwa Bus. Bane bakomeretse Ambulance irahare ngo harebwe uko bagezwa kwa muganga”.

Uyu mufana yasobanuye ko ibyo gukomeza urugendo barabifataho umwanzuro nyuma yo kureba uko abandi bafana bahagaze.

Aba bakunzi ba APR FC bakaba bari bahagurukiye i Remera mu Mujyi wa Kigali ku wa 15 Kanama 2024 Saa sita z’ijoro.

APR FC yo izava mu Rwanda ku wa 16 Kanama ikorere imyitozo ku 17 Kanama 2024 umukino ube ku cyumweru.

APR FC isubiye muri Tanzania nyuma gutsindwa na Simba ku munsi wa Simba Day ibitego 2 kuri 0.