Kutabyara ni ikibazo gihangayikisha imiryango myinshi, cyane cyane iyo abantu bamaze igihe bakora imibonano mpuzabitsina ariko ntihabeho gusama. Mu buzima bwa buri munsi, usanga kutabyara bishobora guteza amakimbirane mu rugo, bamwe bagashinjanya cyangwa umwe agashinja mugenzi we kuba nyirabayazana w’ikibazo.
Nyamara, mu by’ukuri kutabyara bishobora guterwa n’impamvu zitandukanye, haba ku mugore cyangwa ku mugabo, kandi akenshi bishobora no kuvurwa igihe ikibazo kimenyekanye hakiri kare.
Mu buvuzi bavuga ko umuntu cyangwa abashakanye bafite ikibazo cyo kutabyara igihe bamaze igihe bakora imibonano mpuzabitsina mu buryo busanzwe ariko ntihabeho gutwita. Hari igihe ibi bitera ihungabana rikomeye mu bashakanye, bamwe bagahitamo gushaka abana hanze cyangwa gukora ibindi bikorwa bibi bitewe no kwiheba. Nyamara, inzira nziza ni ukugana muganga kugira ngo ikibazo gisuzumwe neza.
Kutabyara bishobora guterwa n’impamvu nyinshi zitandukanye. Hari igihe umugore aba adakora imibonano mu gihe cye cy’uburumbuke, cyane cyane ku bashakanye batabonana buri munsi. Hari kandi igihe umugore agira aside nyinshi cyangwa ubushyuhe bwinshi mu gitsina ku buryo intanga z’umugabo zipfa zitaragera aho zigomba kugera. Ku ruhande rw’umugabo, ashobora kugira intanga nke cyangwa intanga zitari nzima, bigatuma gusama bitabaho.
Hari n’igihe umugore aba afite ikibazo cy’intanga zitakura neza cyangwa yaracuze imburagihe, ndetse hari n’igihe umugore n’umugabo baba bafite ikibazo cyo kudahuza mu buryo bw’amaraso (Rhesus factor). Ibi byose bishobora gutuma gutwita bidashoboka nubwo abantu baba basa n’abazima.
Iyo umugore adasama, akenshi ahora ahangayitse ndetse agatekereza byinshi bishobora no kugira ingaruka ku buzima bwe bwo mu mutwe. Ni yo mpamvu ari ngombwa ko ikibazo cyose gifatwa nk’ikibazo cy’abashakanye bombi, aho gushinja umuntu umwe gusa.
Nubwo kutabyara bishobora gutera ubwoba, inkuru nziza ni uko hari uburyo bwinshi bwo kubivura bitewe n’impamvu yabiteye. Iyo umuntu ageze kwa muganga, babanza gukora ibizamini bitandukanye kugira ngo bamenye neza ikibazo. Hari abagore bahabwa imiti ifasha intanga gukura neza, abagabo bafite ikibazo cy’intanga nke bagahabwa imiti n’inama z’imirire zibafasha kuzongera.
Mu gihe ikibazo ari imiyoboro yifunze cyangwa uburwayi nka endometriosis, umugore ashobora kubagwa. Hari kandi n’abafite ibibazo by’imisemburo cyangwa aside nyinshi mu gitsina bahabwa imiti ibikemura. Iyo ikibazo gikomeye cyane, hari igihe abaganga bafasha abashakanye gukoresha ubundi buryo bwo kubona umwana cyangwa bakabafasha gufata imyanzuro iboneye.
Ikintu cy’ingenzi abantu bakwiye kuzirikana ni uko kutabyara atari umuvumo cyangwa igihano. Ni ikibazo cy’ubuzima gikeneye gusuzumwa no kuvurwa n’abaganga babifitiye ubushobozi. Ni ngombwa kandi kwirinda gufata imiti y’inyiganano cyangwa kujya ku bapfumu bavuga ko bavura kutabyara batabifitiye ubushobozi bwa gihanga.
Mu gusoza, kutabyara ni ikibazo gishobora kugira ingaruka ku muryango no ku mitekerereze y’abantu, ariko iyo hagizwe ubushake bwo kwisuzumisha no gukurikiza inama za muganga, hari amahirwe menshi yo kubona igisubizo. Kubahana no gushyigikirana hagati y’abashakanye ni ingenzi cyane mu guhangana n’iki kibazo.
Ibyifuzo by’abasomyi
