Ubusanzwe ukwezi kwa Ukwakira kuzirikanwamo
ubukangurambaga bwo kurwanya kanseri y’ibere, inzobere mu buvuzi zishimangira
ko kumenya igihe cyo gutangira kwisuzumisha ari ingenzi mu kuyirinda no
kuyivura hakiri kare.
Ishami ry’Umuryango w’Abibumbye ryita ku buzima, World
Health Organization, rigaragaza ko iyi ndwara iri mu zihitana benshi ku Isi,
aho mu 2023 abarenga 670,000 bayizize.
Mu kiganiro yagiranye n’ikinyamakuru mpuzamahanga cya CNN, muganga Leana Wen yasobanuye byinshi ku
bijyanye no kwisuzumisha kanseri y’ibere:
ABAGORE BAGOMBA GUTANGIRA RYARI
KWISUZUMISHA?
Abagore benshi basabwa gutangira kwisuzumisha bakoresheje mammogramu guhera ku
myaka 40, bagakomeza buri mwaka kugeza nibura ku myaka 74. Ibi byemezwa
n’akanama ka U.S. Preventive Services Task Force gashinzwe gukumira indwara.
NI BANDE BAKWIYE GUTANGIRA MBERE Y’IMYAKA
40?
Abagore bafite ibyago byinshi, nko kuba bafite abo mu muryango barwaye iyi
kanseri (nka nyina cyangwa mushiki wabo), cyangwa abigeze kuyirwara, bashobora
gusabwa gutangira kwisuzumisha mbere. Ni byiza kugisha inama muganga.
ESE KWISUZUMA KU GITI CYAWE BIRAKENEWE?
N’ubwo ubushakashatsi bwerekana ko kwisuzuma ku giti cyawe bitatanga inyungu
nini nk’iya mammogramu, abagore basabwa kumenya impinduka ku mibiri yabo.
Ikibyimba gishya ni kimwe mu bimenyetso by’ingenzi, nubwo atari buri kibyimba
kiba ari kanseri.
NI GUTE WAGABANYA IBYAGO BYO KUYIRWARA?
Hari ibintu umuntu ashobora kwirinda nko:
- Kureka
itabi
- Kugabanya
cyangwa kureka inzoga
- Gukora
imyitozo ngororamubiri
- Kurya
indyo yuzuye intungamubiri
Ibi byose bigabanya ibyago bya kanseri harimo
n’iy’ibere.
ESE ABAGABO NA BO BARAYIRWARA?
Yego, nubwo ari gake, abagabo na bo bashobora kurwara kanseri y’ibere. Abafite
amateka y’iyi ndwara mu muryango bagirwa inama yo kujya bagisha inama abaganga.
Kwisuzumisha hakiri kare no kumenya amakuru ku kanseri y’ibere ni intambwe
ikomeye yo kuyirinda no kuyivura neza. Kwitaho ubuzima no kugisha inama
abaganga bigira uruhare runini mu kuyirwanya.
