Ikipe ya Rayon Sports FC yashimiye abafana bayo bo muri Mozambique ku rukundo, ubufasha n'ubwitange bakomeje kuyigaragariza, ivuga ko uruhare rwabo ari ingenzi mu gukomeza kubaka umuryango w'abakunzi b'iyi kipe, nubwo baba bari kure y'u Rwanda.
Mu ibaruwa yashyizweho umukono na Murenzi Abdallah, Perezida wa Association Rayon Sports, yo ku wa 26 Ukwakira 2026, ubuyobozi bw'iyi association bwashimiye abafana ba Rayon Sports Fan Club bo muri Mozambique ku bwitange bagaragaje mu gushyigikira ikipe yabo.
Iyo baruwa igira iti: “Turabashimira by'umwihariko uburyo mwakiriye ikipe kuva ku munsi wa mbere yahageraga, mukayiba hafi, mukaza kuyishyigikira kuri stade no kuyitera ingabo mu bitugu.”
Ubuyobozi bwa Rayon Sports bwagaragaje ko uburyo abafana bo muri Mozambique bakiriye ikipe, bakayiherekeza kandi bakayishyigikira mu gihe yari mu gihugu cyabo, ari ikimenyetso cy'urukundo rufitiye iyi kipe.
Ibaruwa ikomeza ivuga ko ubufasha bw'abafana butagarukira gusa ku gushyigikira ikipe mu kibuga, ahubwo ko bunafasha gukomeza umubano n'ubufatanye hagati y'abakunzi ba Rayon Sports, aho baba bari hose.
Ubuyobozi bwagize buti: “Ubufasha bwanyu bwagize uruhare rukomeye mu korohereza ikipe no gutuma yumva iri mu muryango wayo, nubwo yari kure y'u Rwanda.”
Rayon Sports yanashimye urwego rw'ubwitange, ubufatanye n'ubudaheranwa byaranze abafana bayo bo muri Mozambique, ibasaba gukomeza kubungabunga ubwo bumwe kugira ngo burusheho gukomera.
Iyi baruwa yasojwe n'ubutumwa bwo gushimira abafana mu izina ry'ubuyobozi, abakinnyi, abatoza n'umuryango mugari wa Rayon Sports, ibibutsa ko uruhare rwabo rufite agaciro mu rugendo rw'ikipe.
Rayon Sports ni imwe mu makipe afite abafana benshi mu Rwanda, kandi kuba ifite abafana bayishyigikira no hanze y'igihugu bigaragaza uko umupira w'amaguru ushobora guhuza abantu b'ingeri zitandukanye, hatitawe ku mbibi z'ibihugu.
Ibyifuzo by’abasomyi
