Brig. Gen. Geofrey Gasana yagizwe Umupilote wa Perezida

Perezida wa Repubulika y’u Rwanda akaba n’Umugaba w’Ikirenga w’Ingabo z’u Rwanda (RDF), Paul Kagame, yagize Brig. Gen. Geofrey Gasana Umupilote wa Perezida, anamuha n’inshingano zo kuba Umujyanama wa Minisitiri w’Ingabo n’Umugaba Mukuru w’Ingabo ku bijyanye n’Ingabo zirwanira mu Kirere. Izi nshingano zatangajwe mu ijoro ryo ku wa 24 rishyira ku wa 25 Mutarama, binyuze mu itangazo ryashyizwe ahagaragara na Minisiteri y’Ingabo. Muri iri tangazo kandi, Perezida Kagame yanashyizeho Col. Dan Gatsinzi nk’Umugaba Wungirije w’Ingabo zirwanira mu Kirere ushinzwe ibikorwa bya gisirikare. Guhabwa izi nshingano byahise bitangira gushyirwa mu bikorwa ako kanya, bigaragaza icyizere bagiriwe n’inzego nkuru z’Igihugu. Brig. Gen. Geofrey Gasana asanzwe ari umupilote w’inararibonye mu Ngabo z’u Rwanda, ariko ni ubwa mbere mu mateka hatangajwe ku mugaragaro inshingano z’Umupilote wa Perezida. Ibi bigaragaza intambwe nshya mu micungire y’inzego z’umutekano n’imiterere y’imirimo yihariye isaba ubunyamwuga n’ubwizerwe bukomeye. Brig. Gen. Gasana aheruka kuzamurwa mu ntera mu mwaka wa 2023, ava ku ipeti rya Colonel, icyo gihe akaba yari Umugaba Mukuru Wungirije w’Ingabo zirwanira mu Kirere. Ku rundi ruhande, Col. Dan Gatsinzi ni umusirikare wagaragaje ubushobozi n’umurava mu myitozo n’amasomo ya gisirikare. Yahawe ipeti rya Colonel muri Nzeri 2024, avuye ku rya Lieutenant Colonel, anamenyekana nk’umunyeshuri wabaye uwa mbere mu basirikare barangije amasomo mu Ishuri Rikuru rya Gisirikare i Nyakinama mu mwaka wa 2025. Mbere y’izi nshingano nshya, yari asanzwe ari Umuyobozi ushinzwe ibikorwa mu Mutwe w’Ingabo z’u Rwanda zirwanira mu Kirere. Izi mpinduka mu buyobozi bw’Ingabo zirwanira mu Kirere zigaragaza gahunda y’Igihugu yo gukomeza gushimangira umutekano hashingiwe ku banyamwuga babifitiye ubumenyi, ubunararibonye n’indangagaciro zibereye urwego barimo. Zerekana kandi uko u Rwanda rukomeje kongera ubushobozi bw’inzego zarwo z’umutekano mu rwego rwo kurengera Igihugu no gushyigikira imirimo yo ku rwego rwo hejuru isaba ubwitange n’ubushishozi.