BONHEUR YvesNubwo muri rusange ahenda, amabuye y’agaciro ntagura kimwe ku Isoko. Hari n’ubwo usanga igiciro cya rimwe gikubye icy’irindi inshuro hafi igihumbi.
Uribaza uti “ni irihe rihenze kurusha andi mu 2024?” Ikinyamakuru Finance Online cyibanda cyane ku by’ishoramari kigaragaza ko ‘blue diamond’ ari yo ihenze cyane kuko carat imwe yayo igura hafi miliyoni $4.
Muri iyi nkuru, haragaragazwa amabuye y’agaciro 10 ahenze kurusha andi mu 2024.
Blue Diamond
Agaciro k’iri buye kageze kuri miliyoni $3.93. Guhenda kwaryo bishingira ku kuba ari imbonekarimwe, uko rirabagirana, ndetse no gukomera kwaryo.
Bivugwa ko rikunzwe cyane n’abantu benshi ugereranyije n’andi mabuye, rikoreshwa mu by’inkundo, kandi rikaba ryamamazwa kenshi.
Musgravite
Iri ryavumbuwe muri Australia mu 1967 ariko riboneka ku isoko cyane mu myaka ya 1990. Nyuma y’aho, ryabonetse no muri Madagascar. Ribarwa mu y’imbonekarimwe kuko carat imwe yaryo igura ari hagati ya $30,000 na $50,000. Agaciro karyo mu 2024 kageze ku $35,000 kuri carat imwe.
Jadeite
Bibarwa ko carat imwe y’iri buye mu 2024 igurwa $20,000. Rikunze kuboneka muri Myanmar, abenshi mu barigura bakaba barikoresha mu migenzo y’iyobokamana, ubuvuzi, intwaro gakondo, ndetse no mu mikufi (bijoux).
Alexandrite
Agaciro k’iri kageze ku $12,000 kuri carat imwe mu 2024. Ryagaragaye bwa mbere mu Burusiya mu myaka ya 1830, rikaba rishyirwa ku rutonde rw’ahenze kandi adapfa kuboneka kuko carat imwe yaryo igura hagati ya $10,000 na $50,000. U Burusiya ni bwo bwakomeje gufatwa nk’igicumbi cyaryo, ariko ryaje kuboneka no muri Sri Lanka, Brazil, no mu bice bimwe bya Afurika y’Iburasirazuba.
Red Beryl
Carat imwe y’iri igura $10,000 mu 2024. Riboneka bigoranye kurusha ‘diamants’ ndetse rikagira agaciro karuta aka Zahabu inshuro igihumbi. Kuva ryavumburwa n’Umunyamerika Maynard Bixby mu 1904, riboneka ahantu hamwe ku Isi, mu misozi ya Wah Wah iherereye muri Utah, muri Leta zunze Ubumwe za Amerika. Carat yaryo imwe usanga akenshi igura hagati ya $10,000 na $100,000.
Padparadscha Sapphire
Carat imwe y’iri buye igeze ku $8,000 mu 2024. Rikunze gucukurwa muri Sri Lanka ariko rikaboneka no muri Madagascar na Tanzania. Gusa iyo ricukuwe muri Sri Lanka ni bwo agaciro karyo kaba kari hejuru cyane bitewe ahanini n’ibara.
Benitoite
Agaciro ka carat imwe y’iri buye mu 2024 kageze ku $3,800. Riboneka cyane i California muri Leta zunze Ubumwe za Amerika, ari naho ryavumbuwe mu 1907. Ryabanje kwitiranywa n’iryitwa sapphire, bimenyekana ko ryihariye mu 1985. Ribarwa mu riboneka gake kandi rihenze kuko carat imwe yaryo hari ubwo igura arenga $10,000. Uretse muri California, iri buye ryanabonetse muri Arkansas no mu Buyapani.
Black Opal
Mu 2024, carat imwe y’iri buye iragurishwa $3,500. Riboneka muri Australia kuva mu 1877 kandi nabwo hake cyane, mu mabara atandukanye arimo umutuku, icyatsi, cyangwa ubururu. Magingo aya aho riboneka cyane ni muri New South Wales, carat imwe yaryo ikaba igura ari hagati ya $3,000 na $10,000.
Demantoid Garnet
Carat imwe y’iri buye mu 2024 irabarirwa agaciro ka $3,300. Ryavumbuwe na Nils Gustaf Nordenskiöld mu Burusiya, mu Kinyejana cya 19. Ribarwa mu mabuye aboneka gake cyane kuko mu Burusiya ni ho hagifatwa nk’igicumbi cyaryo, ndetse biragoye ko wabona irirengeje carats 10 kuko akenshi aba ari mato.
Taaffeite
Carat imwe y’iri buye irahabwa agaciro ka $2,500 mu 2024. Bivugwa ko riboneka gake inshuro miliyoni ugereranyije na ‘diamants’. Ryavumbuwe bwa mbere n’Umunya- Irlande Edward Charles Richard Taaffe mu 1945, rikaba ryarabonetse muri Sri Lanka, Tanzania n’u Bushinwa.
Carat imwe yaryo usanga akenshi igura hagati ya $2,000 na $4,000, nubwo hari ishobora guhenda cyane nk’indobanure ikageza ku $35,000. Ikunze kwifashishwa mu ikorwa ry‘ imikufi.
