Abahanzi babiri b’indirimbo zo kuramya no guhimbaza Imana bibarutse nyuma y’amezi atatu bakoze ubukwe

Aba bahanzi Nshimiyimana Robert, uzwi nka Roberto, na Marie Iratwibuka Salome, bazwi cyane muri Kiliziya Gatulika, bibarutse imfura yabo nyuma y’amezi atatu bakoze ubukwe.

Ubukwe bwabo bwabaye ku wa 13 Nyakanga 2024, maze nyuma y’amezi atatu n’iminsi ibiri basezeranye imbere y’Imana, bakira umwana wabo w’imfura, ibyo bikaba byabashimishije cyane.

Batangaje ibyishimo by’umuryango bavuga ko bari bamaze igihe bategereje uyu mwana, kuva mu kwa mbere, kandi bashimishijwe no kuba umwana n’umubyeyi bameze neza.

Aba bahanzi bazwi cyane mu ndirimbo zihimbaza Imana ndetse bagiye batumirwa mu makorali akomeye nka Chorale de Kigali na International et Ensemble Instrumental de Kigali. N’ubwo uyu mwaka batakoze indirimbo nyinshi bitewe n’ibikorwa by’ubukwe no kwitegura umwana, Roberto yavuze ko bazakomeza gukora ibihangano mu bihe biri imbere.

Album yabo ya mbere bise “Icyaha,” bamuritse mu Ugushyingo 2023, yamenyekanye ku ndirimbo zakunzwe zirimo “Umwungeri mwiza,” “Dufite Imana,” na “Ihorere.”