Mugenzi Vincent, umugabo w’imyaka 51, yatawe muri yombi nyuma yo gufatanwa amafaranga y’amiganano yari amaze kwishyura inzoga yari anyoye mu kabari.
Mugenzi ni uwo mu Mudugudu wa Kakirenzi, Akagari ka Gisari, Umurenge wa Kinazi, Akarere ka Ruhango mu Ntara y’Amajyepfo, ariko yari acumbitse mu Mudugudu wa Rugabano, Akagari ka Ninzi, Umurenge wa Kagano, Akarere ka Nyamasheke.
Nk’uko byavuzwe n’umwe mu bari muri ako kabari kari mu isoko rya Rwesero muri Umurenge wa Kagano, Mugenzi yageze muri ako kabari mu ma saha y’umugoroba ku wa Kane, tariki ya 30 Mutarama 2025. Yakoresheje amafaranga y’amiganano ubwo yari aguze icupa ry’urwagwa. Yatoye amafaranga ibihumbi bitanu (5,000) afite isura idasanzwe, bituma abantu muri ako kabari babona ko ayo mafaranga ashobora kuba ari amiganano. Nyuma y’uko nyir’akabari abimenye, yitabaje ubuyobozi n’inzego z’umutekano.
Uyu mugabo yavuze ko ayo mafaranga yayahawe n’umugore atabashije kumenya amazina, wari umuguriye urusenda rw’amafaranga ibihumbi 10 (10,000). Yavuze ko atari azi ko ayo mafaranga ari amiganano. Yongeyeho ko uwo mugore yamuteye ifaranga ry’ibihumbi bitanu (5,000), aragaruka agura urw’amafaranga 1,000, amugarurira amafaranga 4,000.
Umunyamabanga Nshingwabikorwa w’Umurenge wa Kagano, Uwimana Damas, yavuze ko uyu mugabo yahise atabwa muri yombi, akaba afungiye kuri sitasiyo ya RIB ya Kagano, aho akurikiranwa ngo agaragaze iby’ayo mafaranga. Yagize ati: “Yashyikirijwe RIB, Sitasiyo ya RIB ya Kagano ari gukurikiranwa.”
Ubuyobozi bw’Umurenge bwatangaje ko bugiye gukomeza gukangurira abaturage, cyane cyane abacuruzi, kugira amakenga igihe babonye amafaranga bashidikanyaho, bakaba basabwa gutanga amakuru kugira ngo byigenzurwe. Banasabye abacuruzi kwitondera amafaranga bahawe, kuko mu gihe bashobora kurangara, bagahabwa amafaranga y’amiganano, bikaba byabaviramo gufatirwa ibihano.
Naramuka ahamwe n’icyaha, Mugenzi Vincent azahanishwa ingingo ya 269 y’itegeko no 68/2018 ryo ku wa 30/8/2018, riteganya ibyaha n’ibihano muri rusange, aho azahanishwa igifungo kitari munsi y’imyaka 5 ariko kitarengeje imyaka 7.
