Muri Mozambique Venancio Mondlane yatangaje ko azirahiza nka perezia nyuma yo gutsindwa amatora

Umunyapolitiki Venancio Mondlane nyuma yo gutsindwa amatora y’Umukuru w’Igihugu muri Mozambique, yatangaje ko ku wa 15 Mutarama 2025 azirahiza nka Perezida mushya w’iki gihugu.Uyu mugabo yabitangaje abinyujije ku rubuga rwe rwa Facebook.

Mondlane utavuga rumwe n’ubutegetsi yabaye uwa kabiri mu matora yabaye mu Ukwakira uyu mwaka, gusa yanga kwemera ibyayavuyemo kuko yemeza ari we Perezida watowe n’abaturage.

Ni mu gihe imibare y’ibyavuye mu matora yerekana ko umunyapolitiki Daniel Chapo wo mu ishyaka FRELIMO riri ku butegetsi ari we watsinze amatora ku majwi ari hejuru ya 70%.

Amatora yo muri Mozambique yakurikiwe n’imyigaragambyo ndetse n’imvururu kuri ubu zimaze kugwamo abarenga 100 biganjemo abarashwe n’inzego z’umutekano, mu gihe abarenga 3,000 bamaze gutabwa muri yombi. Ku wa 15 Mutarama ni bwo Daniel Chapo azarahirira kuba Perezida wa Mozambique, nk’umusimbura wa Filipe Nyusi ucyuye igihe.

Mondlane abinyujije kuri Facebook yatangaje ko kuri uwo munsi na we azarahira, asaba Abanya-Mozambique gutangira kwitegura umuhango w’irahira rye. Uyu mugabo kandi yabateguje icyiciro gishya cy’imyigaragambyo ikaze yise “Turbo 8” iteganyijwe hagati y’itariki ya 12 n’iya 16 Ukuboza.