BONHEUR YvesGukoresha imbuga nkoranyambaga ntibikiri ukwinezeza gusa kuri bamwe bamaze kuvumbura ibanga ry’uko bazikoresha zikabaha amafaranga ndetse hari n’abo zamaze guhindurira ubuzima mu buryo bufatika.
Nubwo zifatwa nk’inkota y’amugi abiri ni ukuvuga ko zishobora no gusenya zikangiriza byinshi, ku rundi ruhande imbuga nkoranyambaga ni isoko y’amafaranga ku babiteguye neza bakazubaka mu buryo budahonyora amategeko y’abazishinze cyangwa y’ibihugu zikoresherezwamo.
Bitandukanye n’abazikoresha mu bikorwa byo kwishimisha gusa, ubugizi bwa nabi n’ibindi byaha, hari abazibonyemo amahirwe y’akazi kabinjiriza akayabo, ku buryo mu buryo utabasha kumva, kandi bwashobokera buri wese wabyiyemeje.
Kuri ubu rero, urubuga rwa Forbes rwamaze gushyira ahagaragara urutonde rw’abakoresha imbuga 50 bakize cyane kurusha abandi ku Isi, biganjemo abakomoka muri Leta Zunze Ubumwe za Amerika.
Iyi raporo ya Forbes igaragaza ko amafaranga aba bakoresha imbuga nkoranyambaga binjije yiyongereye miliyoni 20 z’amadolari, ibyatumye yose hamwe agera kuri miliyoni 720 z’amadolari yinjijwe mu mezi 12 ashize.
Ku rutonde rw’abantu 10 ba mbere bakiriye mu gukoresha imbuga nkoranyambaga, Abanyamerika barayoboye, hakaba hagaragaraho umunyafurika umwe, Khaby Lame waje ku mwanya wa 10.
Uyu musore w’imyaka 24 y’amavuko, akomeje kuyoboza iy’icyuma abakoresha TikTok, aho akurikirwa n’abarenga miliyoni 163, ndetse agakurikirwa n’abantu miliyoni 255 ku mbuga nkoranyambaga zose akoresha.
Umwaka ushize, yari yaje ku mwanya wa 11 ubwo yari atunze miliyoni 16.5$, none ubu hagaragajwe ko yageze kuri miliyoni 20 z’amadolari. Zimwe mu mbuga nkoranyambaga urubyiruko rukunda gukoresha harimo, Tiktok, Instgram, snapchat n’izindi.
Izi mbuga nkoranyambaga bazikoresha mu gushyiraho amafoto yabo ndetse n’amashusho agaragaza ubuzima babayeho bwa buri munsi, ndetse bakanamamaza, ibibabyarira inyungu ikomeye.
1 Mr. Beast
2 Dhar Mann
3 Matt Rife
4 Charlie D’AmelioUS
5 Stokes Twins
6 Dixie D’Amelio
7 Mark Rober
8 Alex Cooper
9 Rhett & Link
10 Khaby Lame Senegal
