BONHEUR YvesMu gihe ubushinjacyaha bukomeje kwerekana impamvu umuraperi P.Diddy adakwiye gukurikiranwa afunguye, nawe yamaze kubushinja ko bwakoresheje amashusho ya Cassie Ventura wahoze ari umukunzi we mu rwego rwo kumugumisha muri gereza.
Sean Combs wamamaye ku mazina menshi arimo Diddy, Puffy, P.Diddy, Puff Daddy n’andi menshi, afatanyije n’abanyamategeko be bongeye kugeza icyifuzo imbere y’urukiko gisaba ko yarekurwa, ndetse anagaragaza ko ubushinjacyaha bwakoze ibishoboka byose mu kumwanduriza isura.
Mu mpapuro zisobanura iki kibazo abanyamategeko ba P.Diddy bahaye urukiko mbere y’uko arwitaba kuri uyu wa Gatanu tariki 22 Ugushyingo 2024, uyu muraperi yavuze ko ubushinjacyaha bwarengereye ndetse bukaba bwaranamusebeje imbere y’abantu n’urukiko.
Yavuze ko ubushinjacyaha aribwo bwahaye CNN amashusho ye amwerekana akubita bikomeye Cassie Ventura wahoze ari umukunzi we ndetse bakayasohora mu rwego rwo kugira ngo bamwandurize isura ndetse bereke urukiko ko ari umuntu mubi.
Yagize ati: ”Ariya mashusho berekanye iminota mike aho nkubita Cassie kugira ngo bereke urukiko ko ndi umuntu mubi ntakwiye kuburanira hanze, bayasohoye ngo banduze izina ryanjye mu bantu. Kuba ntaremererwa gufungurwa ni ukubera ariya mashusho kandi bayasohoye batagamije kwerekana ukuri ahubwo bayakoresheje nk’intwaro indwanya”.
Ibi P.Diddy abitangaje mu gihe ku wa Kabiri w’iki cyumweru aribwo ubushinjacyaha bwongeye gusaba urukiko ko yakomeza gufungwa kugeza urubanza rwe rutangiye muri Mata ya 2025. Ubushinjacyaha kandi bwagaragaje ko P.Diddy ari gukoresha abana be mu rwego rwo kugira ngo arekurwe.
Ubushinjacyaha bwavuze ko mu minsi ishize ubwo abana ba P.Diddy basohoraga amashusho bamwifuriza isabukuru nziza, ngo babikoze ariwe wabibabwiye ndetse ngo ni nawe ubabwira ibyo batangaza ku mbuga nkoranyambaga no mu itangazamakuru kugira ngo berekane ko bamukeneye mu rugo maze urukiko rumurekure. Bagize bati: ”Arakoresha abana be ngo atere impuhwe urukiko”.
