Inkongi y’umuriro yibasiye ububiko bw’intwaro ku mugoroba wo kuri uyu wa Kabiri tariki 31 Werurwe 2026 mu Mujyi wa Bujumbura, iteza impungenge mu baturage bo muri ako gace.
Iyi nkongi yemejwe n’Umuvugizi w’Igisirikare cy’u Burundi (FDNB), Brig. Gen. Baratuza Gaspard, wavuze ko yatewe n’impanuka yabereye mu bubiko bw’imbunda.
Amakuru yatangajwe ku mbuga nkoranyambaga agaragaza ko aho iyi nkongi yabereye ari mu bubiko bw’intwaro buri muri Zone ya Musaga, aho hasanzwe hacumbikiwe ibikorwa bya gisirikare.
Ku ruhande rwa Ministry of Public Security Burundi, abaturage bahumurijwe ko ibintu biri kugenzurwa neza, basabwa gukomeza gutuza no kudakuka umutima nubwo hari ibisasu byumvikanye biturika.
Iri tangazo ryashimangiye ko ibyo guturika byatewe n’inkongi y’umuriro yafashe mu nkambi ya gisirikare, atari igitero cyagabwe ku gihugu.
Nubwo hataratangazwa niba hari abahitanywe n’iyi nkongi cyangwa niba hari ibyangiritse byinshi, abaturage bo muri ako gace bakomeje gukurikiranira hafi uko ibintu bihagaze.
Si ubwa mbere muri Burundi habaye inkongi zikomeye, kuko mu 2023 nabwo umuriro wibasiye amaduka manini i Bujumbura, wangiza ibintu byinshi, bikekwa ko watewe n’ikibazo cy’amashanyarazi.
Iyi nkongi nshya yongera kugaragaza impungenge ku mutekano w’ibikoresho bya gisirikare n’ingaruka bishobora kugira ku baturage babituriye.
