Nk’uko imibare y’Ikigo cy’Igihugu cy’Ibarurishamibare (NISR) igaragaza mu myaka itandatu ishize kugeza mu 2024, abantu 54.287 basanzwemo Virusi itera Sida, abo mu Mujyi wa Kigali n’abo mu Ntara y’Iburengerazuba bakiharira umubare munini.
Imibare yatangajwe n’Ikigo cy’Igihugu cy’Ibarurishamibare (NISR) igaragaza uko ubwandu bwa Virusi itera Sida buhagaze mu Rwanda mu myaka itandatu ishize kugera mu 2024.
Iyi mibare yerekana ko muri iyo myaka yose abantu 54.287 ari bo basanzwemo Virusi itera Sida, bikagaragaza ko ikibazo cya Sida kikiri kihari n’ubwo hari intambwe igaragara imaze guterwa mu kuyikumira no kuyivura.
Mu mwaka wa 2024 honyine, abantu 9.019 basanzwemo Virusi itera Sida. Muri abo, abagabo bari 3.503 mu gihe abagore bari 5.516. Aba banduye bagaragaye mu bantu 1.026.851 bari bipimishije, bigaragaza ko abagore bakomeje kugira umubare munini ugereranyije n’abagabo. Ibi ni na ko byagaragaye no mu myaka yabanje.
Mu 2023 hapimwe abantu barenga miliyoni 1.1, aho abafite Virusi itera Sida bari 9.270, abagabo ari 3.752 n’abagore 5.518. Ibi byari byiyongereye ugereranyije n’umwaka wa 2022, aho abanduye bari 8.507 barimo abagabo 3.404 n’abagore 5.103, mu gihe na bwo hapimwe abantu barenga miliyoni 1.1. Mu 2021, abantu 9.422 basanzwemo Virusi itera Sida, abagabo bari 3.673 naho abagore bari 5.749, mu bantu barenga miliyoni 1.5 bari bapimwe.
Mu 2020, abantu 9.279 basanganywe Virusi itera Sida mu bantu barenga miliyoni 2.09 bari bapimwe. Muri abo abagabo bari 3.577 naho abagore bari 5.702. Iyi mibare yari yariyongereye ugereranyije na 2019, aho hapimwe abantu bagera kuri miliyoni 2.6, hagasangwa abanduye 8.790 barimo abagore 4.750 n’abagabo 4.040.
Ku bijyanye n’aho ubwandu bwiganjemo, Umujyi wa Kigali ukomeje kuba ku isonga mu kugira abantu benshi banduye Virusi itera Sida. Mu 2024, abatuye Kigali basanganywe Virusi itera Sida bari 2.883, mu 2023 bari 2.811 naho mu 2022 bari 2.756. No mu myaka yabanje, Kigali yari iyoboye kuko mu 2021 abanduye bari 2.983, mu 2020 bari 3.136 naho mu 2019 bari 3.707.
Nyuma ya Kigali hakurikiraho Intara y’Iburasirazuba. Mu 2024, abanduye muri iyi ntara bari 2.439, mu 2023 bari 2.675, mu 2022 bari 2.675, mu 2020 bari 2.398 naho mu 2019 bari 2.676. Intara y’Amajyepfo na yo iza mu zikurikiraho kuko mu 2024 abanduye bari 1.573, mu 2023 bari 1.543, mu 2022 bari 1.420, mu 2021 bari 1.589, mu 2020 bari 1.665 naho mu 2019 bari 1.045.
Mu Ntara y’Iburengerazuba, mu 2024 abantu 1.257 basanzwemo Virusi itera Sida. Mu 2023 bari 1.431, mu 2022 bari 1.400, mu 2021 bari 2.460, mu 2020 bari 1.319 naho mu 2019 bari 852. Mu Ntara y’Amajyaruguru na ho, abanduye mu 2024 bari 867, mu 2023 bari 810, mu 2022 bari 728, mu 2021 bari 932, mu 2020 bari 761 naho mu 2019 bari 510.
Iyo mibare igaragaza kandi ko mu myaka itandatu ishize abantu benshi basanzwemo Virusi itera Sida biganjemo abari hejuru y’imyaka 25, bagera ku 41.385.
Bakurikirwa n’urubyiruko ruri hagati y’imyaka 15 na 24, bagera kuri 11.234. Ibi bigaragaza ko Sida ikomeje kwibasira cyane abantu bakuru n’urubyiruko ruri mu kigero cyo gukora no kubaka igihugu.
Abagore batwite bagaragaje na bo umubare uri hejuru. Mu 2024, abagore batwite bafite Virusi itera Sida bari 1.221, mu 2023 bari 1.141, mu 2022 bari 1.420, mu 2021 bari 1.625, mu 2020 bari 1.314 naho mu 2019 bari 1.831. Ibi bigaragaza akamaro ko gukomeza gahunda zo kwita ku bagore batwite kugira ngo hirindwe kwanduza abana bavuka.
Nubwo bimeze bityo, hari intambwe ishimishije imaze guterwa. Mu 2024, abagore banduye Sida bari bafata imiti igabanya ubukana bwa virusi bari 5.570 bangana na 99%. Muri uwo mwaka kandi, couples 67.761 zarapimwe hasangwa izingana na 3.350 aho umwe yari afite Virusi itera Sida undi atayifite.
Mu Ukuboza 2025, Ikigo cy’Igihugu gishinzwe Ubuzima (RBC) cyatangaje ko abantu bafite Virusi itera Sida mu Rwanda bageze ku bihumbi 234, naho buri mwaka iyi ndwara igahitana abagera ku 2.500. Ubwandu bushya bwari buri kuri 2,7% mu bantu bari hagati y’imyaka 15 na 49. Icyakora, u Rwanda rwageze ku ntego za Loni za 95-95-95, ndetse rurenga ku gipimo cya 96-98-98, bisobanuye ko abaturage benshi bamenye uko bahagaze, bafata imiti kandi batakiyanduza abandi.
Minisiteri y’Ubuzima yagaragaje ko imbaraga zakoreshejwe mu kwita ku bafite Virusi itera Sida zitanga umusaruro, kuko mu 2025 abantu bayifite bari hejuru y’imyaka 50 bageze kuri 30% by’abayifite bose. Ibi bigaragaza ko ubuzima bw’abanduye bugenda burushaho kuba bwiza, bikagaragaza icyizere cy’uko gukumira no guhashya Sida bishobora kugerwaho mu gihe kiri imbere.
