Ikipe ya Liverpool yongeye gutsinda Real Madrid mu mikino ya UEFA Champions League, mu gihe Arsenal yakomeje umuvuduko wayo wo gutsinda no kwigaragaza mu matsinda.
Kuri uyu wa Kabiri, habaye imikino yo ku munsi wa kane wa UEFA Champions League ya 2025/2026. Umukino wari utegerejwe na benshi wabereye kuri Anfield, aho Liverpool yari yakiriye Real Madrid guhera saa yine z’ijoro.
Uyu mukino wakurikiwe n’abarenga miliyoni 700 ku isi, watangiye Liverpool isatira cyane, ariko ba myugariro ba Real Madrid bagakomeza kwitwara neza.
Ku munota wa 9, Dominik Szoboszlai yahaye Alexis Mac Allister umupira mwiza, arekura ishoti ryanyuze hejuru y’izamu gato. Nyuma y’iminota mike, Real Madrid yatangiye kwinjira mu mukino, igatangira kugenzura umupira no guhererakanya neza. Ku munota wa 27, Thibaut Courtois yarokoye Real Madrid ku mupira Florian Wirtz yahaye Szoboszlai, ariko uyu munyezamu akuramo ishoti ryari riteye inkeke.
Hari aho Liverpool yashoboraga guhabwa penaliti, ubwo umupira warekuwe na Szoboszlai wakozweho n’intoki na Aurelien Tchouameni mu rubuga rw’amahina, ariko nyuma yo kugenzura VAR, umusifuzi yemeje ko bitari penaliti. Mbere y’uko igice cya mbere kirangira, Real Madrid nayo yabonye uburyo bwiza ubwo Jude Bellingham yinjiranye mu rubuga rw’amahina, ariko ishoti rye rifatirwa neza n’umunyezamu wa Liverpool.
Mu gice cya kabiri, Liverpool yakomeje gusatira binyuze kuri Virgil van Dijk na Hugo Ekitike, ariko Thibaut Courtois akomeza kuba umusingi ukomeye. Ku munota wa 60, Liverpool yafunguye amazamu ku kufura yatewe na Szoboszlai, Alexis Mac Allister ashyiraho umutwe umupira ujya mu nshundura.
Nyuma yo gutsindwa, Real Madrid yakoze impinduka – Camavinga asimburwa na Rodrygo – ariko nta kintu kinini byahinduye. Ku munota wa 74, Kylian Mbappé yagerageje ishoti rikomeye, ariko rinyura impande y’izamu.
Umukino warangiye Liverpool itsinze Real Madrid igitego 1–0, nk’uko byagenze mu mwaka ushize, ikomeza kuyobora itsinda ryayo.
MU YINDI MIKINO YAKINWE:
Arsenal yatsinze Slavia Prague ibitego 3–0 byatsinzwe na Bukayo Saka na Mikel Melino. Napoli yanganyije na Eintracht Frankfurt 0–0. FC Bayern Munich itsinda Paris Saint-Germain 2–1.
Atletico Madrid itsinda Union St. Gilloise 3–1.
AS Monaco itsinda Bodø/Glimt 1–0.
Juventus inganya na Sporting CP 1–1.
PSV Eindhoven inganya na Olympiacos 1–1.
Tottenham Hotspur itsinda FC Copenhagen 4–0.
Aya manota yashimangiye ko Liverpool na Arsenal zikomeje kwitwara neza muri iri rushanwa, mu gihe amakipe nka Real Madrid na PSG agomba gukora ibishoboka byose kugira ngo agaruke mu mukino.
