Ubushakashatsi bushya bwerekanye ko urukingo rwa COVID-19 rushobora gufasha mu kuvura kanseri, binyuze mu gufasha ubwirinzi bw’umubiri kumenya no kurwanya uturemangingo twa kanseri.
Ubu bushakashatsi bwakorewe muri Kaminuza ya Florida na Kaminuza ya Texas MD Anderson Cancer Center, bukorwa ku barwayi barenga 1,000 bafite ubwoko butandukanye bwa kanseri burimo iy’ibihaha n’uruhu. Abarwayi ba kanseri y’uruhu byagaragaye ko abagabo n’abagore 43 bahawe urukingo mbere yo gutangira imiti babashije kubaho neza kurusha abandi 167 batigeze baruhabwa.
Abarwayi ba kanseri y’ibihaha yo ku kigero cyo hejuru byagaragaye ko igihe cyo kubaho cyiyongereye hafi inshuro ebyiri, kuva ku mezi 20 kigera ku mezi 37.Ibi byagaragaye cyane cyane ku barwayi bafite ubu bwoko bwa kanseri, ahanini ubwirinzi bw’umubiri bugorwa no kubumenya no kuburwanya.
Dr. Elias Sayour, inzobere mu buvuzi bw’abana bafite kanseri akaba n’umuyobozi w’ubu bushakashatsi ku ruhande rwa Kaminuza ya Florida, yavuze ko ibi bituma ubwirinzi bw’umubiri bubasha kumenya utu turemangingo twa kanseri vuba.Ati: “Ubushakashatsi bwerekanye ko uru rukingo rutagabanya gusa ibyago byo kwandura COVID-19, ahubwo rufasha no gutuma ubwirinzi bw’umubiri bumenya uturemangingo twa kanseri.”
Dr. Adam Grippin, inzobere mu kuvura kanseri mu kigo cya MD Anderson Cancer Center, yavuze ko abarwayi bahawe urukingo rwa COVID-19 rukoresheje ikoranabuhanga rya mRNA mu minsi 100 mbere yo gutangira guhabwa ubuvuzi byongereye amahirwe yo kubaho.
Ati: “Ibisubizo byaratunguranye, ariko bigaragaza ko urukingo rushobora kuba rufungura ubwirinzi bwari buryamye, rukagira imbaraga nshya zo kurwanya kanseri.”Impamvu nyamukuru ituma uru rukingo rufasha, ahanini ni uko rubyutsa ubwirinzi bw’umubiri rukabasha kumenya uturemangingo dufite intege nke harimo n’udufitemo kanseri.
Mu igerageza ryakorewe ku mbeba, abashakashatsi basanze kuzitera urukingo rwa COVID-19 mu gace kirimo kanseri bishobora gukangura utunyangingo tw’ubwirinzi, tukohereza ubutumwa bukurura utunyangingo tuzwi nka ‘T cells’ ngo turwanye kanseri, bigatuma igabanuka.
Gusa si imbeba zose cyangwa abantu bazabona ibisubizo kimwe, kuko si buri T cell ishoboye kwica kanseri, ahubwo urukingo rufasha gusa utunyangingo dusanzwe mu mubiri kumenya no kugerageza kurwanya kanseri hakiri kare.
