Kwizera Jean de DieuCissy Houston, umuhanzi wa gospel watsindiye ibihembo bya Grammy, akaba nyina wa nyakwigendera Whitney Houston, yapfiriye mu rugo rwe rw’i New Jersey ku wa Mbere afite imyaka 91.
Cissy yatangiye urugendo rw’umuziki ari mu itsinda ry’abaririmbyi b’indirimbo zihimbaza Imana ryitwa Drinkard Four, hanyuma aza kuba umwe mu bashinze itsinda ry’injyana ya R&B, Sweet Inspirations.
Yamenyekanye cyane mu gutera indirimbo z’abahanzi b’ibyamamare nka Aretha Franklin, Chaka Khan, Otis Redding, na Dionne Warwick.
Mu gihe cyaranzwe n’amakimbirane y’irondabwoko n’imyumvire ikumira abagore, umuziki wa Cissy Houston waciye imipaka y’ubwoko no guheza abagore muri muzika, akorana n’abahanzi b’icyo gihe nka Elvis Presley, Bette Midler, na Linda Ronstadt, ibintu bitari byoroshye kubigeraho nk’umugore w’umwirabura.
Mu mwaka wa 1970, Cissy yatangije urugendo rw’umuziki ku giti cye, maze yegukana ibihembo bibiri bya Grammy kubera ubuhanga bwe mu ndirimbo zo kuramya no guhimbaza Imana.
Cissy Houston yari nyina wa Whitney Houston, umuhanzi w’icyamamare mu njyana ya pop, wapfuye mu 2012 ubwo yasanzwe mu bwogero mu cyumba cya hoteri i Beverly Hilton.
Pat Houston, umukazana wa Cissy, ni we watangaje aya makuru abinyujije ku mbuga nkoranyambaga, yanditse ati: “Bimbabaje umutima gutangaza urupfu rw’Umwamikazi wanjye nkunda, Cissy Houston, uyu munsi! Turabasaba kudushyigikira mu isengesho.” Aya magambo yari aherekejwe n’amashusho atandukanye y’uyu muririmbyi.
Cissy Houston yavutse i Newark, New Jersey, ku wa 30 Nzeri 1933, yiswe Emily Drinkard ariko nyuma yaje kwitwa Cissy Houston mu rugendo rwe rw’umuziki.
