Kwizera Jean de DieuUbushakashatsi bushya bwakorewe ku bagore bari hagati y’imyaka 20 na 70 bwerekanye ko abagore babona imibonano mpuzabitsina rimwe mu kwezi cyangwa munsi yaho baba bafite ibyago byinshi byo gupfa imburagihe. Ubushakashatsi bwakozwe n’abashakashatsi bo muri kaminuza ya Harvard bwemeza ko kugira imibonano mpuzabitsina buri gihe bifitanye isano no kugabanya stress, gukomeza ubudahangarwa bw’umubiri, no kugabanya ibyago by’indwara z’umutima.
Mu bushakashatsi bwabo, abashakashatsi bakoze isesengura ry’imibereho n’ubuzima bw’abagore 2,000 mu gihe cy’imyaka 10, basanga abagore babona imibonano mpuzabitsina rimwe mu kwezi cyangwa munsi yaho bari bafite ibyago byo gupfa imburagihe ku kigero cya 28% ugereranije n’abagore bayikora kenshi. By’umwihariko, ubushakashatsi bwerekanye ko abagore bafite imyaka irenga 50 bafite ibyago byo gupfa imburagihe ku kigero cya 49% niba badakora imibonano mpuzabitsina kenshi.
Dr. Janet Rich-Edwards, umwe mu bayoboye ubushakashatsi, yavuze ko ibyavuye mu bushakashatsi bishobora gufasha abaganga mu gufasha abagore mu buzima bwabo bwa buri munsi no kubungabunga ubuzima bwabo muri rusange. Ati: “Kugira imibonano mpuzabitsina buri gihe bifasha abagore kumva banezerewe, bikagabanya stress kandi bigafasha mu gukomeza ubuzima bwabo.”
Abaganga bemeza ko iyi mibare itagomba gutuma abantu batekereza ko imibonano mpuzabitsina ari yo yonyine y’ingenzi mu kubaho igihe kirekire, ahubwo ko ari igice kimwe mu buzima bwiza muri rusange. Ni ngombwa kandi kwibanda ku mirire myiza, gukora imyitozo ngororamubiri, no kugira umutekano mu mitekerereze no mu mubiri.
Ibyavuye mu bushakashatsi biragaragaza uburyo ubuzima bw’imibonano mpuzabitsina bufite uruhare runini mu buzima bw’umugore. Ni ngombwa ko abagore bita ku buzima bwabo muri rusange, harimo no kuba bafite umubano mwiza n’abakunzi babo kandi bakishimira ubuzima bw’imibonano mpuzabitsina.
