Umuhanzi nyarwanda Bruce Melodie yageze mu Mujyi wa Brussels mu Belgium, aho yagiye kwitegura igitaramo azahuriramo n’umuhanzikazi w’Umunya-Uganda Sheebah Karungi.
Ku wa Kabiri tariki 3 Werurwe 2026, Bruce Melodie yifashishije imbuga nkoranyambaga atangariza abakunzi be ko yamaze kugera i Bruxelles, abatumira kuzitabira igitaramo kizaba tariki 07 Werurwe 2026. Mu butumwa bwe, yagaragaje ko yamaze kugera mu mujyi kandi ko agiye guhita atangira imyitozo yo kwitegura gutaramira abazitabira icyo gitaramo.
Iki gitaramo cyateguwe na sosiyete Zentro Nation, iyobowe na DJ Zentro, Umunyarwandakazi utuye mu Bubiligi. Biteganyijwe ko kizabera muri salle izwi nka Birmingham Palace i Bruxelles, mu masaha y’umugoroba.
Iki gikorwa kizahuza aba bahanzi bombi basanzwe bafitanye indirimbo bise Embeera Zo, yashyizwe ahagaragara mu 2018 ikanahabwa igikundiro gikomeye mu bakunzi b’umuziki muri Afurika y’Iburasirazuba. Byitezwe ko bazayiririmba imbere y’abafana babo baba mu Bubiligi no mu bindi bihugu by’i Burayi.
Bivugwa ko iki gitaramo kizahurirana no kwizihiza International Women’s Day, umunsi wizihizwa buri tariki 8 Werurwe ku Isi hose. Abateguye igitaramo batangaje ko ari umwanya wo gushimisha abakunzi b’umuziki no kwizihiza uruhare rw’abagore mu iterambere ry’umuryango.
Ni igitaramo gitegerejwe na benshi, cyane cyane abanyarwanda n’abanya-Uganda baba mu mahanga, bitewe n’icyubahiro n’izina rikomeye aba bahanzi bombi bafite mu muziki wa Afurika y’Iburasirazuba.
