Abatoza 13 b’Abanyarwanda bakorana n’abakiri bato mu kuzamura impano mu mupira w’amaguru batoranyijwe kuzahabwa amahugurwa yo ku rwego rwo hejuru muri Espagne, mu bufatanye bw’u Rwanda n’ikipe ya Atlético de Madrid.
Muri aba batoza harimo Haruna Niyonzima wabaye kapiteni w’Ikipe y’Igihugu “Amavubi” ndetse akinira u Rwanda inshuro zirenga 100. Uretse Haruna, hanatoranyijwe Sifa Gloria Nibagwire wabaye kapiteni w’Ikipe y’Igihugu y’Abagore, hamwe n’abandi barimo Innocent Murwanashyaka, Iragena Oscarie, Joseph Junior Rutagengwa, Nadia Bugenimana, Blaise Itangishaka, Nicolas Hakizimana, Darius Hirwa, Damascène Nsengiyumva, Emmanuel Coman Mugisha, Schadrack Nsengayire na Shema Bravo.
Igikorwa cyo gutoranya aba batoza cyasojwe ku wa 21 Gashyantare 2026, nyuma y’icyumweru cy’amahugurwa yitabiriwe n’abarenga 300. Aya mahugurwa yatanzwe n’abatoza boherejwe na Atlético de Madrid, mu rwego rwo gushyira mu bikorwa amasezerano yasinywe muri Mata 2025 hagati y’u Rwanda n’iyi kipe, binyuze mu Rwego rw’Igihugu rw’Iterambere, RDB.
Abitwaye neza muri ayo mahugurwa ni bo batoranyijwe kugira ngo bajye muri Espagne gukarishya ubumenyi no kongera ubushobozi mu kazi ka buri munsi ko gutoza abana n’urubyiruko.
Perezida wa FERWAFA, Shema Ngoga Fabrice, yashimiye Leta y’u Rwanda ku bufatanye bwazanye Atlético de Madrid mu Rwanda, asaba aba batoza kuzitwara neza no gukora cyane ku buryo mu myaka iri imbere bazaba ari bo bashobora guhabwa inshingano zo gutoza Amavubi.
Aya masezerano y’ubufatanye ateganya kandi ko ikirango cya Visit Rwanda kizajya kigaragara ku myambaro y’imyitozo n’iy’ikwishyushya ya Atlético de Madrid, ndetse kikanamurikwa kuri Stade ya Riyadh Air Metropolitano no ku mbuga nkoranyambaga z’iyi kipe. Harimo kandi kumenyekanisha u Rwanda nk’ahantu nyaburanga h’ubukerarugendo no guteza imbere siporo, ndetse no kumenyekanisha ikawa y’u Rwanda muri Espagne.
