Umunyamabanga Mukuru w’Umuryango FPR Inkotanyi, Amb. Christophe Bazivamo, yakiriye mu biro bye Ambasaderi wa Israel mu Rwanda, Einat Weiss, baganira ku bufatanye bw’ibihugu byombi n’inyungu z’abaturage.
Mu itangazo ryashyizwe ku rubuga rwa X rw’Umuryango FPR Inkotanyi, habonekamo ko ibiganiro byibanze ku buryo ibihugu byombi bishobora kungukira mu nzego zinyuranye. Ubufatanye busanzwe hagati y’u Rwanda na Israel burimo ubuhinzi, ikoranabuhanga, umutekano, amahugurwa y’inzego zishinzwe umutekano, ndetse no gusangira ubunararibonye mu kurwanya iterabwoba.
Mu burezi, Abanyarwanda babona amahirwe yo kwiga no guhugurirwa muri Israel. Hanateganyijwe imishinga ifasha mu rwego rw’ubuzima n’ikoranabuhanga rikoreshwa mu buvuzi. Ku bijyanye n’ubucuruzi, ibigo byo muri Israel bikomeje gushora imari mu Rwanda, by’umwihariko mu by’ikoranabuhanga, ubuhinzi n’ingufu, bigaragaza ko umubano urushaho gukomera no kungukira abaturage.
