Imishinga itanu y’urubyiruko yahize indi mu irushanwa rya Hanga Pitchfest rihuza ba rwiyemezamirimo bato bafite imishinga itanga ibisubizo mu nzego zitandukanye kandi yitezweho guteza imbere impinduka, yahembwe miliyoni 110 Frw.
Hanga Pitchfest ni irushanwa ritegurwa na Minisiteri y’Ikoranabuhanga na Inovasiyo ku bufatanye n’Ishami ry’Umuryango w’Abibumbye rishinzwe Iterambere, UNDP, n’abandi bafatanyabikorwa. Abahanze imishinga itanu yegukanye ibihembo banyuze imbere y’Akanama Nkemurampaka basobanura imiterere yayo ndetse n’ibisubizo yitezweho mu gukemura ibibazo byugarije sosiyete.
Iki gikorwa cyabereye muri BK Arena ku wa Gatanu tariki ya 14 Ugushyingo 2025, kitabirwa n’abayobozi batandukanye bo muri Guverinoma, mu rwego rw’abikorera, urubyiruko n’abanyeshuri bitegurirwa kuvamo abahanga udushya bifashishije ikoranabuhanga. Ikigo cya Re-Banatex cyashinzwe na Jonathan Shauri Kalibatha ni cyo cyegukanye igihembo nyamukuru cya miliyoni 50 Frw. Gifite umushinga wo gukora ibikoresho bitandukanye birimo ibikapu, inkweto n’amatapi bikoze mu nsina.
Umushinga wa kabiri ni uwa Neem, ufasha abantu kumenya uko bahagaze mbere yo kurwara diabete ndetse n’ubujyanama ku kwivuza kare, wahabwe miliyoni 20 Frw. Umwanya wa gatatu wegukanywe na Nabsil Grainbank, ifasha abahinzi n’amakoperative kubika neza imbuto no kuzibyaza umusaruro, yahembwe miliyoni 15 Frw.
Umwanya wa kane watwawe na Ambucycle, ifite imbangukiragutabara ikoreshwa na moto mu gutanga ubutabazi bw’ibanze, naho uwa gatanu uba Ingoga Technologies ikoresha ikoranabuhanga mu kwihutisha serivisi zo kwa muganga. Imitwe yombi ya kane n’iya gatanu yahawe miliyoni 12.5 Frw.
Minisitiri w’Ikoranabuhanga na Inovasiyo, Ingabire Musoni Paula, yijeje ko Leta izakomeza gutera inkunga imishinga y’urubyiruko. Yavuze ko inshingano za Guverinoma ari ugushyiraho uburyo n’ibikorwa remezo bifasha ba rwiyemezamirimo bato kwagura imishinga yabo.
Yashishikarije urubyiruko kubyaza umusaruro amahirwe ari mu mikorere abandi batinya, abibutsa ko bahatana atari ukurwanira ibihembo ahubwo ari uguhindura Afurika mu myaka icumi iri imbere. Yanongeyeho ko buri mwaka Hanga Pitchfest iba urubuga rwo guhanga imirimo n’amahirwe mashya, kandi ko ba rwiyemezamirimo bato batangiye kwerekana ko udushya muri Afurika atari amagambo ahubwo ari ibikorwa bifatika.
Umunyamabanga Mukuru Wungirije wa Loni akaba n’Umuyobozi wa UNDP muri Afurika, Ahunna Eziakonwa, yashimye abamuritse imishinga y’ikoranabuhanga, avuga ko igitekerezo cyatangiranye n’irushanwa cyatangiye gutanga igisubizo kirambye.
Yavuze ko buri mwaka ibitekerezo bigenda byaguka kandi ko ibihembo bahawe ari intangiriro y’urugendo rwo guhindura sosiyete. Yijeje ko Guverinoma y’u Rwanda, UNDP n’abandi bafatanyabikorwa biteguye gukomeza kubaba hafi.
Ahunna yashimye cyane imishinga itanu yageze ku cyiciro cya nyuma, avuga ko ihagarariye abeza mu bahanga udushya mu Rwanda, kandi ko iri rushanwa rimaze imyaka itanu ritangiye ryamaze kwerekana umusaruro ufatika. Mu ba rwiyemezamirimo 45 bemerewe guhatana muri Hanga Pitchfest 2025 bagera mu mwiherero bahabwa amahugurwa, hatoranyijwemo batanu bagaragaje imishinga ihiga indi.
Amarushanwa ya Hanga Pitchfest yabaye ku nshuro ya gatanu kuva yatangizwa mu 2021, agamije gushaka ibisubizo ku bibazo u Rwanda rufite mu nzego zirimo uburezi, ubuzima, ubuhinzi n’ikoranabuhanga. Tariki iyiyi, irushanwa rikomeje kuba urubuga rutera imbere rihuza urubyiruko n’amahirwe yo guhanga ibisubizo bifatika ku bibazo by’igihe tugezemo.
